Stephy及小肥剛獲委任為新一屆「香港電腦節」的「IT大使」，負責推動IT文化以及宣傳電腦節活動。電腦節年年有，不過今屆電腦節確實搞得幾特別，明查暗訪下，搵出當中「三不思議」事件，在此同大家分享一下。

一不思議：Stephy想要專業音響？

既然Stephy同小肥當上今屆電腦節「IT大使」，就問問兩位2010年最想得到邊樣數碼產品？以為Stephy會選電子書一類的產品，誰知她反而最想得到一副有齊耳筒、簡單Mixer的錄音室音響設備，仲笑稱希望經小記寫出嚟，會有知音人送畀佢喎。至於小肥就嫌平時畫畫要用畫紙畫筆麻煩，今年最想得到有Multi Touch功能的Win 7 Tablet PC，可以直接在芒上畫畫。至於2010年數碼界最Hot Topic——3D電視，Stephy同小肥爭住話好想睇，3D科幻片同3D卡通片都係心頭好，而小肥更加想打埋3D遊戲添。幾時會有？等多半年啦！

電子書將會大行其道，本以為才女Stephy會鍾意，但係佢話寧願用手機睇書更方便！	Stephy	今年3D電視將會大熱，小肥都話好想睇。
小肥

二不思議：2010年搞09年電腦節？

踏入2010年先搞「香港電腦節2009」？其實之前都有類似經歷，「香港電腦節2008」在08年12月尾搞，令到2009年冇一個正正式式的「電腦節」。不過舊年就搞過3個類型相近的活動，分別為「東九龍電腦節」、「香港電腦通訊節」同「新界數碼生活嘉年華」，每隔兩、三個月就搞一次，比起以往得「電腦節」及「電腦通訊節」，去年大家掃貨都掃到窮。

去年三大同類活動

09年4月\東九龍電腦節\地點：九龍灣MegaBox

09年8月\香港電腦通訊節\地點：灣仔會展

09年11月\新界數碼生活嘉年華\地點：荃灣廣場

三不思議：電腦節離開深水埗？

去到第八屆的「香港電腦節」，之前次次都在深水埗黃金、高登對出的福華街同桂林街舉行，就算沙士當年大家戴晒口罩都照搞。但今年「香港電腦節」就搬離老巢，在長沙灣遊樂場插旗，原來大會係為公眾安全着想。由於遊樂場場地比以往街頭空間為大，今年大會的規模亦比往年大七成，仲吸引到PCCW、Lenovo、SanDisk、Toshiba、BENQ、Samsung同LG等大廠參展；講特別，要算係今年同台北貿易中心合作引入的「台灣美食坊」，在會場內可以買到烤香腸、貢丸湯、米糕、豬肉紙等小食，夠創新未？

08年底香港電腦節仍然在深水埗街頭逼餐死，今屆就移師長沙灣舉行。

今屆首次引入「台灣美食坊」，早幾日記者會上已經擺定檔畀傳媒率先試食。

掃盡筍價貨

雖然話「電腦節」搞得密，不過一有新產品同劈價優惠，仍然都有捧場客。以下精選幾款「新產品」及「物超所值產品」，全部每日限量賣20部，睇啱價錢就好出手嘞！

新產品 Buffalo DriveStation USB 3.0 1TB

售價：$1,180

（攤位編號：B09, B21）

慳$1,581 Epson P2500相片儲存器

原價：$2,580

會場優惠價：$999

（攤位編號：G20）

慳$160 Visual MP3/WMA Player

原價：$215

會場優惠價：$55

（攤位編號：C08）

新產品 MSI U135 Netbook

售價：$3,598（攤位編號：B09, B21）

新產品 LaCie Starck Desktop 2TB

售價：$2,150（攤位編號：C19）

Buffalo DriveStation USB 3.0 1TB 售價：$1,180（攤位編號：B09, B21）

Visual MP3/WMA Player原價：$215會場優惠價：$55（攤位編號：C08）慳$160

「香港電腦節2009——資訊科技大匯展」

大會主題：綠色環保，鼓勵市民自備購物袋

地　　點：長沙灣遊樂場（長沙灣站A1出口）

開放日期：2010年1月15日（星期五）至18日（星期一）

開放時間：11:00am~10:00pm（1月18日至9:00pm）

查詢電話：2785 8867

撰文：布偉倫

攝影：陳世昌