模界新貴Jessica C.甜美樣子加上魔鬼身材，火速在港闖出名堂，她彷彿一下子擁有名與利，其實她默默耕耘等這天已等了六年！遇上辛苦、艱難的時候，想到家人的愛和支持，Jessica鼓起勇氣面對各種挑戰，她為的不是成名而是最愛的家人。

Jessica C.因拍下兩個廣告本來寂寂無聞的她，一夜成名，來港發展短短四個多月，已極速成為人氣Model。一切似乎來得又快又易，她沒有感到飄飄然，名利並沒有沖昏她的頭腦，每天她仍認真地、耐心地工作，六年來就是等一個突破的機會：「由我初初嚟香港發展到今日，其實等呢刻已經等咗六年。我15歲做Model，去過泰國、新加坡、中國、日本、德國、以色列，當然仲有香港，嚟呢度之前我喺日本工作，發展OK，喺香港發展並冇任何期望，仲諗住畀兩個月時間自己盡最大努力去嘗試，之後就會返日本。」

機遇感驚喜

來港一行，竟是Jessica事業上的轉捩點，闖出名堂後連她自己亦意料不到：「嘩，我遇到嘅機會同所發生嘅嘢都令我好驚喜同意外！接拍Canon同Wacoal兩個廣告係我事業上嘅突破，令我Modeling發展更上一層樓。廣告出街後，要等外界嘅反應先知係咪成功，呢段期間我幫好多雜誌影相，接咗好多Job，爭取曝光率。」大量的工作有時令她疲倦不已，甚至不想繼續做，不過她提醒自己要積極面對，發生的一切她都覺得幸運與開心。

Jessica與男友Sergio同居從不掩飾戀情，男友是她精神上的支柱，當她工作完拖着疲憊的身軀回家，有男友陪她傾偈、支持她，令她覺得十分美好。所以，即使成名後成為傳媒偷拍的對象，Jessica十分理解是記者為了工作：「雖然有時會影到我一啲唔好嘅嘢，好似食煙咁，但係我有今日嘅名氣、賺咁多錢，都係全靠記者幫手，我哋大家嘅關係係互相幫助。」

遷居芝加哥

不少少女渴望做Model，想一夜成名享受虛榮感，Jessica為的不是求名，而是家人的將來：「雖然我因為工作要周圍去，唔可以時時留喺屋企人身邊，不過我由細到大同屋企人都好Close，無論我身在幾遠嘅地方，都唔會改變。」在肯德基出生的她，小時候與家人在農場生活，家境小康，父母努力工作謀生，才令他們有屋住，三餐溫飽。當時小小Jessica已經很想幫輕父母的負擔，令全家生活好一點，直到舉家遷居芝加哥才起了變化，她說：「有日媽咪喺街度見到有個宣傳海報寫住『Becoming a Model』，於是帶我去面試，最後我入咗模特兒學校，為美國著名嘅大型比賽IMTA接受訓練，我就係咁樣入咗行。」

對Jessica來說，沒有其他東西比家人的愛更重要：「我同兩個妹妹最愛媽咪，我哋一家人都好愛大家，每晚臨瞓前都一定會擁抱親吻、仲講I love you。佢哋好相信我，有佢哋嘅支持我先可以撐落去，係屋企人教我咩係無條件嘅愛，無論我成功定失敗，佢哋都一樣咁愛我。」

警鐘胸以外……

Jessica覺得當Model最困難是被人評頭品足，由頭到腳由樣子到身材到皮膚，都逃不過被批評和比較，她曾經跟超瘦Model比較，後來明白到模界可容納不同種類的Model，不一定要行國際大品牌時裝騷：「我比較適合拍廣告，又鍾意演戲同影相，覺得好玩啲。搵到自己嘅位置之後唔需要同人再比較。拍廣告可以有機會演繹唔同嘅角色，我想形象多元化啲，演戲做醜女都得。」

還有她那豐滿的「警鐘胸」亦每每成為焦點，Jessica希望別人勿再Focus在她的胸部，通過她的性格及認真工作來認識她。當打之際Jessica當然毋須計劃何時退休，她會儲錢留作讀書之用：「我唔需要太有錢，太有錢人生會冇咗驚喜，衣食無憂、生活安定，夠用已經足夠。」

Profile

姓名：Jessica C.

出生地：肯德基

國籍：美國

血統：中美混血兒

年齡：21歲

生日：4月18日

星座：白羊座

身高：170cm

三圍：34C、24、35

曾拍廣告：Canon打印機

Wacoal內衣

潔柔衞生紙

文：名人組

圖片提供：she.com