「模Art」Janice Man近日忙於拍戲，還挑戰人體極限，已三日三夜沒睡過並踏入第四天，加上拍跌撞鏡頭拍到周身瘀，令她明白拍戲原來要付出很大代價，她又透露老闆黎明靠打機來提神。

近期忙於趕戲的Janice Man（JM）昨日抽空為JF81開幕活動擔任嘉賓，表面看來頗為精靈的她，原來已超過七十二小時沒有好好睡過，她說：「我挑戰人體極限呀，已經有三日冇瞓過覺，即將踏入第四日，其實搭車時都有瞓吓嘅，不過咁多日夾埋都係瞓得四個鐘咋！（拍戲未埋位時唔瞓吓？）我拍戲唔瞓得架，一瞓完個人就會浮腫。我要靠食零食嚟提神，一唔食就眼瞓喇！」問到可有向老闆黎明請教提神妙法，她說：「我見佢打機，一有時間就個個拎部機出嚟對戰。」

拍戲搞到周身瘀

除了忙於拍戲，JM還大吐苦水指和衞蘭兩人都周身傷，她說：「我哋成身瘀晒，因為要拍啲跌跌撞撞嘅鏡頭，係真做，所以瘀晒，我已經墊定pat，不過跌嘅時候唔中pat，撞到啲骨，我依家先知拍戲嘅人真係要付出好多。（男友有冇心痛？）我連屋企人都冇見差唔多成個星期，男友都好少見，見得最多係同事。（幾時拍完？）依家先開始冇耐咋！」

孫慧雪開舖賣衫

另外，同場的孫慧雪則表示最近自己落本開了一間日韓時裝店，初嘗做老闆娘滋味的她說：「今次投資咗十幾萬，我儲咗好耐架，想學吓做生意。間舖開咗兩個月，生意都唔錯，希望一年內可以回本啦！」

文：名人組