第一集「Assassin's Creed」好玩，但係現實同古代兩邊場景轉得太快，玩到一頭霧水，兩年後「Assassin's Creed Ⅱ」就順應民意改晒上集缺點，仲將故事搬到15世紀文藝復興時期的意大利，場景靚絕外，達文西亦會出場幫手，睇住主角孭住飛行器在空中滑翔，型到震！

撰文、部分攝影：布偉倫

今集主角出水能跳，入水亦能游，不過只識得自由式。

若然名聲太壞，官方會貼上通緝令，撕掉的話可以稍為減低壞名聲。

靚絕意大利實景

「AC2」古代場景設定在15世紀意大利，即處於文藝復興時期，順理成章達文西都會在遊戲出場，更為主角設計新武器同飛行器，真係好吸引。另外，為咗配合威尼斯水鄉的特色，主角仲會一展泳術，不過大家嫌濕身的話，可以隨時推船伕落水自己撐「貢多拉」過河。

笑騎騎放毒蛇

「AC2」以尋找DNA作為主線，主角在古代的身份係一個銀行家個仔，當老父被問吊後就披起白色長袍變身刺客。今集玩法仍然集中在跳躍及爬牆方面，始終在屋頂行事比較方便，亦唔會引起敵對人士的疑心。「AC2」加入唔少新武器，好似斧頭、狼牙棒等，最得意都係放毒針，從背後向敵人拮針，睇住佢掙扎既殘忍又過癮。

請娼妓幫手氹守衞

主角仇家都唔少，人多時記住要慢行以免引起懷疑；如果唔好彩畀敵人發現，除走得快好世界外，亦可以專登撞低途人的物件引起混亂，或者匿在載滿碎葉的手推車入面，不過最搞笑係坐在街角長櫈垂低頭都可以避過敵人耳目。玩家今集亦唔使單打獨鬥，只要畀得起錢，可以請來盜賊幫手偷嘢，又或者請娼妓迷惑守衞，算係新噱頭。要令任務進行得更順利，最好都唔好多做傷害平民的「壞事」，因為今集加入壞名聲系統，名聲太壞的話就連市民都唔會幫你手。

類　　型：動作

開　　發：Ubisoft

平　　台：Xbox 360、PS3

推出日期：已推出

售　　價：$359（Xbox 360標準版）$499（Xbox 360珍藏版）$388（PS3標準版）$508（PS3珍藏版）

查詢電話：2359 7998