唔知係咪唱歌文化盛行，朋友敍舊、生日派對、打風落雨都總有人提議去唱K，近年仲發覺很多o靚仔都勁唱得，《Britain's Got Talent》6歲小康妮唱到出碟，電視台班十幾廿歲參賽者，個個令人拍爛手掌。今次就搵超級新聲何雁詩（Stephanie）和聲樂導師葉富生（Steven），講講由平日練歌到上台表演，有乜秘訣變「巨Sing」。
練歌技巧投入感情
聽過何雁詩唱《On My Own》、《Desperado》，評判話佢發音準、網友讚佢夠感情，但她卻說唱歌唔係自己強項，3年前去學唱歌才發覺用聲有很多技巧，點樣唱先唔會傷聲，點樣令高音唔好咁緊，都是慢慢練出來。練聲方法仲估都估唔到，好似吹嘴唇唱音階、扮卡通人物聲唱歌等，夠晒有趣。
90%走音屬心理因素
無論你唱歌唱得幾好，都有走音的時候，導師Steven話90%走音係心理問題，遇過一位成日走音的新人，佢逐個音跟住唱完全冇事，但一揸咪唱成首歌就驚，愈緊張就愈唔夠氣，愈忍住道氣想啱Key就愈難唱，連原本唱到的都封咗喉。Steven話只要頭頸背直，在適當時間吐咗啖氣才回氣自然會順，再加上經驗和技巧，唱歌啱Key並唔難。
坊間秘訣逐個捉
話明係練歌，當然要練得好先至唱到歌，但坊間成日流傳用些稀奇古怪的方式，真係唔知堅定流。一於睇下聲樂導師點樣解構這些流傳。
流傳1. 早晚高唱「合~尺~」
解構：外國都有唱Scale練音準，例如：牙、亞、丫……（升key上去），習慣了便知道唱高音時怎樣發力。（對）
流傳2. 鹹竹蜂鹹檸七開聲
解構：唱歌唔好單靠飲嘢來開聲，想喉嚨滋潤飲暖水經已OK，外國人冇鹹竹蜂咪一樣唱得咁好。（錯）
流傳3. 頸巾圍住條頸保暖
解構：出入冷氣房或天氣轉冷時，都應該戴番條頸巾保護喉嚨，盡量用鼻腔吸氣會較為濕潤。（對）
流傳4. 唱高音時按住小腹
解構：「丹田」位置在肚臍下方，其實只要上半身支撐得好，毋須按住小腹，按住主要是輔助上身承托。（錯）
流傳5. 含住紅酒塞練咬字
解構：Steven教唱歌都試過叫學生咬住酒塞、筷子等，但作用唔係練咬字，而係令口腔張得更大更鬆。（錯）
歌唱技巧訓練
擴闊音域練氣
方法：吹嘴唇唱音階，跟住樂器練不同Key，可訓練聲帶音域，同時練埋氣。每次做20分鐘。
訓練口鼻配合
方法：扮卡通人物聲唱歌，訓練唔好單靠口來唱歌呼吸，習慣用多一點鼻輔助。每次做15分鐘。
何雁詩
職業：Year 12學生
背景：歌唱比賽參賽者，鍾意打Golf之餘更愛唱歌，曾修讀聲樂技巧課程及參與學生音樂創作計劃，現隨葉富生導師學習。
葉富生
職業：伯樂音樂學院聲樂系總監及導師
背景：於美國主修聲樂，隨聲樂名家Mr. Ate Rojas鑽研聲樂技巧，回港後曾教授歌手包括陳慧琳、謝安琪、梁漢文、梁朝偉等，並應邀培訓新人及團體合唱。
走音三寶 愈唱愈紅
提起走音，一定會諗起黎明、謝Kay、傅穎呢3位人選，本應計埋Stephy有走音四寶，不過依家鄧走音變成鄧流感，成為樂壇第一人個朵仲響過以前，諗諗吓特敏福都應該搵佢做代言人，可以好有說服力咁講「試過真係Work㗎」！
名師指導 學唱飲歌
以前想搵個地方學唱歌真係幾難，唔係齋教粵曲就係私人勁貴，但近年開始有專門的音樂學院，教授流行音樂的作曲、填詞、編曲、監製、歌唱等各範疇，培育專業人才。當中較出名有伍樂城開辦的伯樂音樂學院，搵來林夕、金培達等樂壇猛人教授。
聲樂錄音及演繹技巧高級證書課程
課程： 共59堂（67小時+9小時合唱訓練）
費用： $23,860（可申請持續進修基金）
簡介： 認識人體發聲原理、運用不同發聲方法、培養視唱能力、和音合唱及高階歌唱技巧等
導師：葉富生、雷有輝、高少華等
流行歌唱實習及錄音室體驗課程
課程：共10堂（15小時）
費用：$3,800
簡介：基本技巧指導歌唱實習及錄音室體驗
導師：雷有輝
網址：www.bsm.com.hk
撰文：鍾鎮科
攝影：陳世昌
化妝：Shirley