女星金美倫戴雅絲於新戲《姊姊的守護者》中，初嘗為人母親的滋味，算是演員生涯的一大突破，她透過角色細味母愛的偉大，升級做「媽媽」的她更不擔心影響以後的戲路！　

記：記者

金：金美倫戴雅絲

記：第一次做阿媽角色，個女仲十幾歲大，有冇猶豫過或擔心影響以後戲路？

金：當導演畀劇本我睇時已經覺得好正，我淨係諗個故事嘅意義、角色當時嘅經歷同面對嘅事情，根本冇關心要飾演媽媽呢類角色，更加唔會諗對自己事業嘅影響，呢啲都唔係我擔心嘅！

記：本身未做過媽咪，戲中個女仲有重病，你點揣摩呢個角色？

金：其實我有同故事中嘅媽媽莎拉接觸過，知道當愛得好深好深時會係點同埋會做嘅事。我亦同過有類似經歷嘅媽媽傾偈，明白到作為長期病童嘅父母，真係會做盡一切之能事，佢哋真係好偉大，好值得表揚！

道德審判

記：在道德上，你又點睇戲中莎拉為大女所做嘅一切呢？

金：起初我都有自我審判呢個人，但我發現根本做唔到，因為我根本唔知有個就嚟死嘅小朋友會係咩一回事。對於佢哋嚟講已經唔係對錯嘅問題，只係想盡自己所能同做一個啱嘅決定，過程中全是未知之數，只要個小朋友可以生存落去，就係好嘅決定。

記：其實戲中都有好些具爭議的題材，當中有冇一啲同你個人信念有衝突嘅想法？

金：我覺得呢套戲嘅成功地方係令觀眾去感受，而非批判個媽媽為咗救個女而所做的一切。我初初都有諗「點樣去演呢個可能令人覺得冷漠無情嘅角色」、「點可以為咗一個小朋友而要令另一位小朋友付出」……不過到最後，所有道德問題都被置諸門外，因為你根本冇辦法去批判呢個女人。

有感染力

記：係咪因為「家庭」這因素吸引你接拍？

金：家庭真係好重要，我相信所有演員都被呢點所吸引。我認為我嘅家人同朋友，係我生命中最寶貴嘅財富，大家互相愛護，有人進入亦有人離開你嘅生活，有人逗留長啲，有人又喺你生活中來來回回，好奇妙！

記：同兩位小女星Sofia Vassilieva及艾碧姬布絲蓮合作感覺如何？聽聞你喺片場煮嘢畀佢哋食？

金：係呀！我每日都會問佢哋想食乜，然後喺休息車煮畀佢哋。我覺得佢哋都係好出色嘅演員，艾碧姬表達力好強，好有感染力，而蘇菲亞就好有條理，所有情緒同感情都處理得好好，真係好開心同佢哋合作。

陽光小小姐笑唔出

現年十三歲的艾碧姬布絲蓮，於戲中飾演金美倫的細女Anna，她坦言今次的角色是一大挑戰：「你一定會認為Anna只是普通小女孩一名，不會明白她為甚麼不想再幫她的姐姐。其實Anna亦很迷惘，她作了個很難的決定。」她更指在《姊姊的守護者》中，並沒有好人壞人之分，大家都只是去做自己認為對的事情而已。

艾碧姬指戲中有很多哭的戲份，而對比起其成名作《陽光小小姐》，兩個角色是截然不同，不可作比較，就連拍攝期間心情都不一樣，她說：「當演喜劇的時候，你會想辦法不要笑，但當演《姊》的時候，我就要告訴自己不要哭。」

文：外娛組