「潮」模Angelababy將有份參與日本潮爆時裝騷，而自言未有計劃衝出香港的好姊妹「模Art」Janice Man（JM）就坦言不會視對方為競爭對手，反而會視名模「老闆娘」樂基兒為學習對象，如此口乖，相信Janice前途必無可限量！
昨日Janice Man與安志杰等出席「The Swatch Artist Collection」揭幕禮，將長髮卷曲成短髮的Janice形象清爽。她表示自中一起便沒有剪短過頭髮，是一心想塑造女神形象嗎？她笑說：「唔係，只不過長頭髮變化多啲，而且自己又唔捨得剪。」
顧掂自己先
談到好姊妹Angelababy升呢在日本行騷？Janice說：「暫時自己就未有打算，公司想我做好依家嘅工作先。（吃不到的葡萄是酸的？）唔會，我會戥朋友開心，每個人嘅發展路向都唔同，有機會當然會珍惜！」記者問到會否視Baby為競爭對手？她笑說：「同行有咁多人，唔通個個都係敵人咩？顧掂自己先。（咁會視邊個為學習對象？樂基兒？）一定會呀，佢係model界嘅前輩，好想學習佢嘅成就。」至於她因休息了一會而事業不及Baby？她續說：「我都冇得控制，大家喺唔同階段，我自己的確休息咗一排，但反而覺得精神咗！」
此外，早前Baby去了日本擔任《Rich》時裝騷的特別嘉賓，同場巧遇日本名模Liz，兩人惺惺相惜！此行她更為雜誌《Sweet》拍攝相片，而負責Baby形象指導的正好是日本大型時裝店Kitson的買手，她跟Baby合作過後大讚對方有潛質，更即時邀請她為Kitson行騷。而除了Kitson外，Baby還會為Marc by Marc Jacobs擔任模特兒。
行騷唔使試
雖然Baby是首次為Tokyo Girls Collection行騷，但因她早前在日本工作表現佳，所以連試鏡也不用，認真巴閉！至於近期風頭躉周秀娜亦會同行？她笑說：「同台實有機會，大家加油啦！其實東京每年有好多大型時裝騷，呢個只係其中一個！」
文：名人組