喺未有海底隧道之時，大家要過海返工返學，就一定要喺碼頭搭船，遊一段船河至得，所以每當上落班嘅時間，碼頭例必人山人海。時至今日，搭船嘅人少咗，碼頭變成另類民生設施，今日就由嚟自外星嘅Cheaperman，帶大家走訪港九碼頭，發掘當中嘅唔同特色！
釣魚勝地
Cheaperman今日奉隊長之命，要去人類嘅碼頭睇吓有冇好玩嘅嘢介紹，幾經辛苦，終於去到紅磡碼頭，呢度十分清靜，Cheaperman等咗好耐都唔見有船，但就見到好多人圍住碼頭邊嘅欄杆喺度手舞足蹈，於是引起佢嘅好奇心。
Cheaperman走埋去睇吓，原來好多人喺度釣魚，Cheaperman第一時間搵個人嚟訪問吓，見到有個小朋友，於是問佢喺度做乜嘢？佢話釣緊魚，Cheaperman再問佢需要乜嘢工具？佢話一塊四蚊嘅魚排加啲魚餌就可以玩足一日，最後問佢收穫如何？佢話日日都可以幫阿媽加餸囉！睇嚟碼頭冇乜客人，最啱街坊釣魚，但係唔識釣魚又點算呢？
海鮮熱賣
Cheaperman第二站就過咗北角碼頭，呢度冇咁多人釣魚，但就發現好多人嚟買海鮮，原來碼頭邊有間賣海鮮嘅舖頭，由於價錢實惠，而且海鮮生猛，款式夠多，深受街坊歡迎，每逢到咗上落班嘅時間，生意更加好，密密麻麻逼滿晒買魚嘅人。
但老闆話佢哋主要嘅客人，並唔係買海鮮嚟食嘅朋友，而係買嚟放生嘅人。原來北角碼頭邊有個小碼頭，呢度成日都有人嚟放生，即係買啲魚嚟放番入海，意思係做善事喎，呢一層令Cheaperman好唔明，但有意義嘅事絕對值得鼓勵，至於第三站Cheaperman又去邊度呢？大家登上ontv生活台，就會知道詳情！
HotClick三甲
第一位：《就係咁易》肥皂防刮腳
大家有着過新鞋都會知道，着幾日之後，就會有刮腳嘅情況出現，有時會貼塊膠布就算，但大家有汗，塊膠布一甩，又會痛到入心入肺。今日生活台《就係咁易》就教大家一個方法，用肥皂輕塗喺新買番嚟嘅鞋邊上面，咁就唔會再刮腳，至於點解有咁嘅效果，大家登上ontv生活台，就會有詳細嘅介紹。
第二位：《就係咁易》肥皂防起霧
好多朋友沖完熱水涼之後，想再剃鬚或者吹頭嘅時候，就會發覺浴室塊鏡起晒霧氣，就算用乾布點抹都要等一陣至用得，今日生活台《就係咁易》就教大家一個好好嘅方法，防止浴室塊鏡起霧水，就喺沖涼前用舊肥皂，濕少少水出力捽落塊玻璃，唔使擦晒，你要幾大面積就擦幾多，之後……想知效果係點，快啲登入ontv啦！
第三位：《就係咁易》吞拿魚麵包卷
小朋友放暑假喺屋企，日日食快餐店食物都唔係辦法，ontv生活台《就係咁易》將會喺下個星期，搵嚟香港專業教育學院美食導師Au Yeung，教大家做一個簡單得嚟營養豐富又好食嘅小食「吞拿魚麵包卷」，材料當然要麵包同埋罐頭吞拿魚，另外仲要準備一啲青瓜條、洋葱粒，至於製作方法，記得下星期上ontv生活台！
撰文：布永德