憑《巴別塔》中啞女一角成功上位的日本著名女星菊地凜子，最近再拍荷里活新片《騙騙喜歡妳》，與金像影帝艾哲倫保迪大鬥演技，更自言揀戲無分語言，夠晒國際化。

菊 = 菊地凜子　記 = 記者

記：你會覺得自己係日本女演員抑或係國際女星呢？

菊：我參與國際電影嘅演出，並唔係想藉此令我喺世界各地嘅名氣更響，純係滿足自己。我會睇吓自己鍾唔鍾意個角色，而去揀選想演嘅戲。我唔會理套戲係日本片定國際片，亦唔會理套戲有冇訊息，不過如果好似《巴別塔》咁可以教到人嘅話，我都樂意去拍。我希望未來接拍多啲唔同類型、有挑戰性嘅角色。

表達角色真性情

記：你係咪寧願演啲有戲味嘅角色？好似《騙》片中嘅角色咁？

菊：我好鍾意呢類角色，因為我真係好鍾意演戲，尤其透過角色去表達真性情，絕對可視之為挑戰！我希望藉此來表達人性嘅弱點。

記：不如講吓你喺《騙》片入面飾演咩角色？

菊：我飾演一個呃神騙鬼嘅騙子，亦係一個專門製造炸彈嘅專家，都算係一個壞女孩，哈哈。

記：你之前喺《巴別塔》同畢彼特合作，而今次你就同另一型男艾哲倫保迪合作，感覺如何？

菊：Wow，我真係好彩！

兩句對白仍高興

記：你喺《騙》片嘅拍攝期間過得怎樣？

菊：好開心！不過我喺套戲入面只得兩句對白，所以呢刻我已經唔識講英文喇。拍攝嗰陣確係遇到好多困難，不過同艾哲倫及導演Rian Johnson合作得好好。我當正佢哋係我哥哥，真係幫咗我好多。

記：你喺《巴別塔》飾演日本問題少女，但由於依家日本嘅年輕人會視你為榜樣，揀角色時會唔會多咗責任？

菊：我又唔係咁睇，因為我又唔覺我嘅演出會影響日本年輕一代。其實我演嘅角色大部分都係虛構，只會喺電影入面出現。

記：你下一部戲會係邊套？

菊：下一部戲會係《諜海風雲》，周潤發有份做。美國即將會上映。

麗歌有性格靴足全場

於《騙騙喜歡妳》飾演女主角彭美露的麗歌慧絲，受訪時稱一直恨拍喜劇，而今次終於得償所願，又指等了「彭美露」這個角色很久：「我未曾想像過會成為彭美露呢一類人，不過我一直期待呢類角色，奇奇怪怪咁，我好鍾意。」

麗歌又透露，戲中很多服飾都是她的「私伙」，因為她向來喜歡收集復古及奇裝，尤其女主角由頭穿到尾的一對靴，負責服裝的同事認為十足彭美露style，非用不可。麗歌自爆，現實中的她與彭美露亦有相似的地方，就是冒險精神十足，她表示曾與一位女性朋友自駕遊，在美國及南非等地穿州過省，認真大膽。

文：外娛組