Michael Jackson突然猝逝，相關物品即變成搶手貨，就連12吋Figure也炒至天價兼斷貨。唔想捱貴貨，不如等Hot Toys推出的第二彈MJ Figure，今次採用最經典的《Thriller》造型，紅衣少年兼送多個喪屍頭。無論歌迷還是收藏家，都應該買個回家誠心「供奉」。

送多個喪屍Look

MJ《Thriller》一碟，推出至今創下一億一千萬張銷量，前無古人，相信亦後無來者。Hot Toys今次以MV中的造型創作Figure，可謂比上次的Billie Jean Ver.更具代表性。MV最震撼人心一幕，莫過於MJ轉身變成喪屍，因此除紅衣少年外，Figure隨盒還送多個喪屍頭及破爛紅皮褸供玩家替換；後者更是全人手製作，呈現出極為像真的舊化及破爛感，絕非一般車工可以媲美。只是要留意吊腳褲及黑皮鞋只有一套，若Fans想一個價錢同時展示兩個造型，難免會失望而回。

提供紅衣少年及喪屍兩大造型，兩個都咁神似，很難抉擇擺放何者。	以HT的造衫經驗，紅色皮褸唔算難製作，最欣賞是連衫袖位設有鐵扣都留意到，十分細心。	Figure精髓是這件破皮褸，全經人手剪破、磨爛，呈現與別不同的殘舊感。
放大圖片	地台設計唔算特別，期望廠商將來再出DX版本，為Figure提供一個更好的背景。

選用Slim Body

上代的MJ頭雕被玩家批評得體無完膚，雖然今次繼續由韓籍頭雕師Kang In Ae負責，但在大師Yulli監督下，面相已大為進步，頭髮、輪廓甚至MJ當年的黝黑膚色也忠實呈現。廠商更表示，這個版本跟早前在日本宣傳海報內的面相不同，後者「扁口扁面」，新版則展露微笑，希望玩家能回想MJ和藹一面。特別一提，由於MJ當年身形偏向瘦削，因此Figure特別選用代號為TTM09的Slim Body作素體，穿起緊身褲後，令整體外形更為像真。

有賴《Thriller》MV長達14分鐘，造型師有足夠片段捕捉MJ面相，令未整容前的靚仔樣重現人間。	唔係好多明星肯醜化自己，MJ連喪屍都敢扮，Figure便附送喪屍Look讓歌迷懷念一番。	全身多達32個關節，Moonwalk話咁易！

撰文︰陳志滔

攝影︰郭凱敏

查詢電話︰2388 4677