落沙灘玩水玩波波？一大班Friend玩就啱，如果好似今次只得靚模Rainbow同Monique兩個，又有乜好玩呢？匿埋太陽傘底下互「打」都係唔錯嘅選擇，唔通佢哋爭風呷醋大打出手？當然今次呢個「打」係「打機」個「打」。在烈日下兩位靚模用PSP大戰5個回合，邊個打贏、邊個要接受大懲罰呢？即刻去片！
Round 1：勇者30 考反應！
可以話係最講求速戰速決嘅遊戲，每版只得30秒時間，睇完指令之後，仲要完成如打倒魔王等任務，一拎起手就令人「精神緊張」！新玩家如兩靚模可能睇唔慣遊戲內的8-bit時代公仔設計，但角色爛爛哋其實都幾有Feel！
類型：動作
每回合所需時間：30秒
好玩指數：4 (最高5)
Round 2：Patapon 2 考節奏！
女仔節奏感通常都比較強，玩起「Patapon」這類音樂Game自然有着數。遊戲本身有幾個四拍嘅指令，無論前進、後退、進攻以及防禦，都要跟番背景音樂嘅節拍輸入，最終目標當然係帶領一班黑媽媽嘅族人戰勝各種外敵。
類型：音樂
每回合所需時間：5~10分鐘
好玩指數：4.5
Round 3：絕體絕命都市3 考鎮定！
第三集「絕體絕命都市3」雖然食番第一集地震條橋，不過聰明在今次加多咗個「治癒系」女角，識得彈結他幫大家減減壓；而且遊戲支援4人連線合作走難，唔好盡信娛樂新聞報道，靚模都可以互相合作完成任務㗎！
類型：動作
每回合所需時間：10~15分鐘
好玩指數：3.5
Round 4：「LocoRoco 2」考細心！
以可愛造型現身嘅「LocoRoco」一向係女生至愛嘅遊戲，第二集一樣要操控彩色肥波周圍跳集齊更多同類。遊戲竅妙之處係好多寶物同波仔朋友都匿埋在秘道，唔細心嘅話就攞唔到高分。
類型：動作
每回合所需時間：10~20分鐘
好玩指數：4.5
Round 5：勇者實在太囂張or2 考頭腦！
角色設計同「勇者30」好相似，但「勇者實在太囂張or2」就要玩家扮演破壞神，幫魔王挖掘迷宮兼繁殖各種魔物消滅「入侵」嘅勇者，玩法夠另類，而且一玩就好難放手。
類型：策略
每回合所需時間：15~20分鐘
好玩指數：4
賽果發表
經過5回合打機比試，數一數Monique贏咗3個，成為大贏家當然開心死，打輸咗嘅Rainbow惟有接受大懲罰……其實都只係畀水槍射吓，拍攝當日有成攝氏33度，畀水射吓消吓暑反而有着數！
PlayStation Network室內加時再戰
Rainbow輸咗當然唔忿氣，今次將「戰場」由沙灘搬番室內，鬥玩幾款可以在PlayStation Store下載購買得到嘅新遊戲，唔知可唔可以復仇成功呢？
營救胖公主
遊戲古仔相當搞笑，各自嘅公主都喺敵方手上做人質，但係大家嘅缺點都係「為食」，玩家要營救己方嘅公主外，仲要不斷餵食物畀對方公主，令佢變肥難以被對方救走。好明顯，遊戲中兩位胖公主唔會係Rainbow同Monique囉！
類型：動作
Worms 4人連線
「Worms」玩法夠簡單，就係利用各種武器亂擲狂炸，最強更可出到香蕉炸彈（Banana Bomb），炸到對方粉身碎骨。遊戲收錄20個任務，最多更可以同3個朋友連線對打添！
類型：動作
結果：
Rainbow終於贏番一次，成功大平反！不過打機Just for Fun，輸贏都唔需要太介懷嘅。
Monique（周凱盈）
興趣：聽歌、Shopping、影相
最喜愛遊戲：「太鼓之達人」
《夏之盛放》出場日期：7月17日
Rainbow（胡心諾）
興趣：畫畫、聽音樂、睇書
最喜愛遊戲：「太鼓之達人」
《夏之盛放》出場日期：8月14日
撰文：布偉倫 攝影：林資凱 服裝提供：Roxy
網址：asia.playstation.com