《哈利波特混血王子的背叛》本周上映，主角「哈利仔」丹尼爾烈格夫日前接受本報訪問時，便揚言要揀個「識駁嘴」嘅女友，更唔介意年紀比自己大，又自稱有足夠經驗拍接吻戲，看來這個「哈利仔」真的長大了！

記者：記

丹尼爾：丹

記： 你跟住個「哈利」一齊成長，感覺如何？同角色之間係咪已建立到一種親和力？

丹：係㗎！一部分哈利我好喜歡，但有部分就唔喜歡。開頭幾集覺得佢唔夠信朋友，最後就係一個好全面嘅角色，演起來好有挑戰性。

記： 喺《哈利波特》系列中與不同演員合作過，從佢哋身上學到甚麼？

丹：我嘅模範幾時都係演天狼星嘅加利奧文，佢唔係拍過好多好片，但每次演出都咁有水準，好值得學習，如果可以達到佢差不多嘅演戲功力，我就會係世上最開心嘅人。

想演音樂劇

記：對於大結局《死神的聖物》分開兩集拍有何看法？

丹：好開心第七回分兩集，因為原著嘅篇幅實在好長，好難將所有嘢濃縮一部戲之內。分開兩集有助交代書中嘅情節，效果會更好。

記：呢一、兩年除咗《哈》片，會否接拍其他戲？之前趁空檔演的百老匯舞台劇《Equus》，對你演戲有何幫助？

丹：我諗唔會拍住！合約下年中屆滿，到時就係自由身。《Equus》對我演藝生涯來講係大躍進，演現場嘅舞台劇鍛煉集中力、保持警覺，因為隨時都有意想不到嘅事在台上發生，要懂得應變，仲要留住體力，因為唔知幾時需要。將來有機會都想重返舞台，只要我學好唱歌，我都想演吓音樂劇。

記：外間成日話你鍾意年紀大過你嘅女生，其實你擇偶條件係點？

丹：做我女友不僅要聰明，且要比我更聰明，同時要有自己意見，會挑戰我嘅想法，仲要係個亮麗而有個性嘅女生。而年紀大過我嘅女生，因為佢哋都有工作，會體諒到我有時夜晚開工陪唔到佢，好似我咁大嘅就難明啲，而且成熟啲嘅女生真係好cool！

接吻經驗足

記：《哈》第六集入面，你會同飾演金妮嘅Bonnie Wright有咀戲，感覺如何？

丹：初時有啲怪，唔係缺乏技巧，自覺呢幾年已有足夠練習，哈哈，而係因為我十一歲就識Bonnie，但最後總算完成到。最近睇番，先發現我咀嘅時候雙唇好似隻馬咁嘟起，真係要同Bonnie講聲對唔住。

記：《哈》片系列即將拍完，有冇諗過攞番支魔法棒留念？

丹：冇啊！因為喺拍攝時，我整爛咗無數咁多支，我諗攞番去最後都係會整爛。不過，我會偷走大結局入面嗰張通緝哈利嘅海報囉。

妙麗啜完榮恩起飛腳

在《哈利波特混血王子的背叛》中，妙麗暗戀好友榮恩，飾演妙麗的愛瑪沃森近日拍攝大結局時，更會與「榮恩」路拔格連咀嘴，她笑說：「我有少少撲咗落佢度，大家都好緊張，好想快啲搞掂。個個人都想喺片場睇呢場好戲，好彩監製使走丹尼爾，減輕我哋壓力。」

而妙麗在大結局中會有多些動作場面，愛瑪興奮表示：「我好鍾意大結局入面嘅勞動場面，妙麗仲會鬢辮，令我覺得好似羅拉咁。呢個係好嘅轉變，我剛做完情感戲，係時候畀我踢吓人籮柚啦！」

章怡英國直擊