十年前，容祖兒只是一般人眼中發歌星夢的黃毛丫頭，膽粗粗去參加歌唱比賽，得英皇這位「伯樂」賞識；十年後的今日，祖兒已貴為樂壇天后，細味十年間，是得多於失，展望將來，最想跳出香港，並以一年時間躋身大中華天后。

展望將來

記：記者　容：容祖兒

容：依家最大歌唱目標係全力發展大陸市場，呢個市場好大，要殺出一條血路，我要比喺香港勤力十倍或百倍以上。回歸祖國發展係大勢所趨，要由朝做到晚，做到要返酒店咬枕頭發洩，雖然係條辛苦路，我有信心達到終點目標。

記：會唔會減產，騰出多啲時間達到既定目標？

容：我諗都會減少少囉，我最想做對社會有貢獻嘅事，因為我喺社會度得到好多嘢，所以未來我要幫助有需要嘅人，用自己少少的號召力回饋社會。

記：唔做歌手，有乜想做？

容：退休對我嚟講係好遠好遠嘅事，但得閒無事都會諗吓㗎，我想做從未做過嘅嘢，譬如學做生意做老闆娘，我唔會好大諗頭要做大生意、跨國企業主席咁，開間細規模美容院或者私房菜啦，我鍾意扮靚想同人客分享化妝扮靚心得，我鍾意食嘢咪想開食店囉，哈哈……

盡得人心

記：年頭嘅音樂頒獎禮爭持激烈，攞唔到獎會唔會唔甘心？

容：頒獎禮都過去咗啦，呢啲係遊戲，聽到外間咁多支持我嘅回響已經好開心，證明有咁多人認同我嘅努力，若果歌迷因為我攞唔到獎而唔開心，我會勸佢哋唔好咁諗，我喺思想上、行為上都成熟咗，只會諗台上唱歌同表演啲嘢，其他我控制唔到嘅都唔會諗咁多！頒獎禮只係一個過程，自己努力過，其他嘢唔係大家想像中咁重要。

我一直都好努力工作，希望畀大家知道我容祖兒唔係hea緊，今年係我入行第十年，人大咗諗嘢都成熟咗，我會吸取過去嘅經驗，去選擇想做嘅嘢，要做啲有效果、對事業真係有幫助嘅工作，令人更加認同我，唔會再做啲唔鍾意做嘅嘢，好在公司好支持我，大家早已有共識。

交友交心

記：今年最開心係乜？

容：最開心係多咗好多朋友，以前同我比較熟嘅全部都係英皇歌手，好似阿Sa（蔡卓妍）、阿嬌（鍾欣桐）、霆鋒同Eason（陳奕迅），仲有識咗好多年嘅何詩（何韻詩）啦，今年多咗啲傾得埋嘅friend，好似張敬軒、王菀之。以前可能我唔識同人溝通，就算想同唔同公司嘅人傾偈，多數都係助手同助手之間去講，無形中大家多咗隔膜，依家我識交個心出嚟同其他歌手做朋友。

記：有乜得益？

容：友誼真係好寶貴，我喺佢哋身上學到好多嘢，吸取人哋嘅優點，又可以分享自己嘅喜與樂，人都開朗咗，雖然我哋唔係成日約出嚟食飯或者玩，但每次見面都好多嘢講，同王菀之熟落之後，我發覺原來佢真係喺外星度嚟㗎！

兩個媽咪

記：祖兒，點解你媽咪近年好少陪你開工？

容：以前媽咪成日陪我開工，近幾年係少咗，我唔係唔鍾意，而係唔想佢咁辛苦，我都大個女又有位得力助手，佢都好似阿媽咁照顧我，我有兩個好錫我嘅阿媽，覺得自己真係好幸福！雖然媽咪冇陪我開工，佢一樣好緊張我，佢好勁㗎，我任何時間返屋企——就算幾夜幾早都好，佢都會知，只要我未返屋企或未出門口，佢都唔會返入自己房休息，佢唔係喺屋企享清福，一樣幫我燙衫、執房、煲湯，如果將來我嫁人，一定要媽咪陪我一齊嫁、一齊住，我要成日黐住佢。

記：咁你細佬呢？

容：以前就要供細佬讀書，依家佢大個仔，有自己嘅工作同發展，我都好放心，我冇要求細佬攞錢返屋企養家，只要佢照顧到自己，我就好放心㗎啦！

後記

成功非僥倖，祖兒事業有成，貴為樂壇天后，和她的敬業精神絕對有關。今次專訪，因祖兒貴人事忙要分上下集兩日進行，第二part專訪，為遷就檔期，只能在早上十時進行，祖兒為爭取時間親自化妝、整頭，要求高的她又擔心效果差，經常問：「我個頭得唔得呀？個妝掂唔掂呀？」每拍完一個鏡頭即忙於補妝，希望以最靚姿態示人。

訪問做完，祖兒即趕往錄音，她半點也不會投訴辛苦，笑住話：「唔辛苦，有少少時間食碗麵添呀！」祖兒，真個知足常樂。

採訪：音樂組

攝影：黎志輝

場地：太子酒店

髮型：Hair Culture@Heibic Mok

化妝：YoYo