初出道以性感造型示人的李蘢怡，力斥靚模頻拋胸上陣，令現今娛圈風氣敗壞，並不屑地表示靚模單靠性感而不發掘自己所長，等同一個廢人，更揚言當初自己行性感路線是錯誤的選擇！
李蘢怡前晚出席派對時，被問到現今一眾靚模頻以低胸性感包裝出現，她力斥現今風氣敗壞，她不屑地說：「潮流興嬌小玲瓏同好瘦嘅女仔，我同Angelababy合作過，佢好靚，我冇留意其他靚模喎！」至於一眾靚模大多是性感拋胸上陣？她忽然十分勞氣：「我有樣嘢想講，社會風氣唔好，袒胸露臂係唔健康，未必個個讀者想睇，呢種方法係吸引到人注意，但係咪有咁必要？」
她又表示初出道時拍完修身廣告後便以性感示人，坦言是選擇錯誤：「當時唔識揀，呢個係經驗，經驗令人成長，正如我依家咁勤練歌舞，係一種武器、實力，要搵自己潛能，否則做藝人係廢，如果淨靠身材，第一次就OK，當時係多人認識，但之後點做係好重要，冇理由一世咁玩（拋胸性感）。」
妙瑛勤消毒防疫
同場，陳妙瑛坦言豬流感（H1N1甲型流感）肆虐，也有叫員工保持衞生，多加清潔，她又表示：「我間化妝學校冇停課，又唔係幼稚園同小學，係成人教育；無論係學校定食肆，我都叫員工每一小時清潔消毒。」她又透露將有新教育計劃推出，但詳情未能透露。
梓岐開心即結婚
而諸葛梓岐被問到與男友感情穩定，有否結婚計劃？她坦言結婚是很長遠的事，但不夠一秒間又說：「開心咪結囉！（男友係你結婚對象？）啱咪咩……我唔知點答。（有冇向你求婚？）冇，隨緣啦！」而對於青少年濫藥，她力斥風氣不好，並說：「我都有朋友叫我試，但我驚而拒絕。」
另邊廂的李彩華對於日前被本報拍得與男友王傲山拖手仔見家長一事，她仍死撐說：「大家朋友啫！拖手唔代表拍拖，我同男或女性朋友都會拖手行街。（男、女朋友都咀呀？）都可以呀！」她又表示年紀唔細，對感情唔係玩玩吓，結咗婚就唔可以離婚，所以要謹慎睇清楚。
文：名人組