Angelababy否認撇陳偉霆冧混血男

Angelababy（楊穎）與英皇新人王William（陳偉霆）傳出情海翻波，昨又有新進展，有傳Baby近日與隸屬同公司的新人中英混血兒James Parry行埋，James更熟落到踩上Baby酒店房玩。Baby經理人Kim澄清James從來冇同Baby一齊去過日本及巴黎，更遑論上房玩，她說：「Baby冇講過有人上佢房，雜誌記者係問佢有冇同外籍人拍過廣告，Baby先答係咪同佢一齊拍婚紗廣告嗰個男仔？但報道出嚟就將問題換咗，變成同你好熟，去你間房傾偈嗰個男仔。（Baby同James係咪好熟？）淨係做過兩次嘢。」

讚James靚仔

昨日Baby為其代言的護膚品牌Clarins拍攝廣告，由助手陪同離開，心情大好的她澄清報道冇一點係真，與Kim的口徑一致，更表示沒有James聯絡電話，但直認與William保持聯絡，她說：「我哋（與William）一直都係好朋友，我冇唔聽佢電話，睇完報道之後大家有聯絡，仲講笑添，（Kim有冇唔畀你拍拖？）唔會，avex亦冇話唔畀拍拖，合約無咁條例。」雖然如此，提到James時，Baby卻忍不住讚對方的確好靚仔，但自言比較喜歡中國人。

Baby昨為護膚品牌拍廣告。

William與Baby仍然保持聯絡。

此外，Baby與William分別同鐘錶界美女胡敏珊合作設計的腕錶Angelababy ×Chouette和William × Chouette腕錶昨日同時曝光，Baby的腕錶共有藍、粉紅和白三色，而William則一黑一白，兩人分別在錶底簽名，認真合拍。