回憶老香港膠情深厚

由廳中的櫈仔、廚房的豉油樽到廁所的漱口杯，幾十年來，塑膠用品在家居無孔不入，與港人「膠」情深厚！近日舉行的懷舊膠品大晒冷，大朋友盡情想當年、小朋友也可認識老香港，無論男女老少，都會找到觸動神經的寶物。

塑膠用品 無孔不入

屋企人圍桌「黐膠花」、陳寶珠拎住飯壺高歌「工廠妹萬歲」、制水時期家家戶戶挽着紅A水桶大嗌「樓下閂水喉」……從五、六十年代起，塑膠用品進駐香港人生活每一部分。塑膠之所以無孔不入，歸根究柢，因為塑膠業曾是香港的黃金工業，加上塑膠輕身、耐用、扮嘢能力強勁，價廉物美，輕易融入平民百姓家。

展場布置成六、七十年代典型香港家居，喚起你我集體回憶。	透明大波波內藏多件膠品，讓大、小朋友一起尋寶。	漏斗膠椅 漏斗形膠椅堪稱紅A經典，部分椅面印上卡通，更可揭開存放玩具。
扮嘢石椅 塑膠可塑性極高，說它是石屎造，絕對能騙人！	工廠飯壺 出街食唔划算，以前打工仔必備飯壺。	仿水晶燈 一般家庭買不起水晶燈，扮嘢膠片燈正好取而代之。現時仍有不少人專登在網上Bid！
黐膠花 從前塑膠花工廠外判定單予「山寨廠」，即家庭式或小規模工場，阿媽、阿女一齊黐膠花，據說每穿一籮（十二打）約有四毫子工資。	多功能膠盆 這款半透明膠盆於七、八十年代風靡一時，幾乎每家每戶都有。平日當生果盤、派對上盛載小食、新年當全盒，極之多功能。	像真龍鳳 龍鳳筷子匙羹盛器，遠看似銀製，拿上手輕飄飄才知是膠質。

多年珍藏 公諸同好

近日就有展覽大玩「塑膠」主題，一起回憶陪伴我們成長的舊事舊物。由三位收藏家借出經年珍藏。Vincent A.Y.長於香港工業黃金時期，熱愛一切「香港製造」；Kim Kam是紅A的死硬粉絲，連產品包裝、廣告及產品目錄都不會放過，還有鍾情舊物的馮永權。展品由日用品、傢俬、玩具到文具統統網羅館中。必睇首推「香港之寶」紅A，不少產品出口外國，洋人看到「香港製造」等同上等貨，令港人覺得只要自強不息，自然有機會得到認同。

紅Ａ太空篋 當一般學生都用藤書包，紅A太空篋的出現即時成為潮物，拎住招搖過市，吸引不少艷羨目光。	字母擦膠 綠帽白身的字母擦膠，七十年代之友一定識。	玩具黑膠唱機跟真身一樣，買少見少。
以前是玩具電話，如今則多是玩具手機，足見時代變遷。	熱鬥小馬 一唧氣泵，小膠馬飛奔向前，親子可即場熱鬥小馬，互動一番。捐款$20可抱走一隻。

「香港膠質生活」展覽

日期：即日至7月31日

時間：1:00pm~5:00pm（逢星期三及公眾假期休息）

地點：灣仔民間生活館（灣仔石水渠街74號地舖）

費用：免費

查詢：2835 4376

撰文：梁淑敏

攝影：陳世昌

模特兒：Karie（Joint Hill）、思行