在模特兒界，露點或透點都會引來一陣轟動！姚書軼（Mikki）及Mandy Lieu兩位不同氣質的名模，誰也搶不了誰風頭，但兩人卻異口同聲，認為香港人對性感的尺度，原來是意想不到的保守，連透點都大驚小怪。
曾走過國際天橋的Mikki，露點透點已是家常便飯，但是轉到香港模界發展後，就發現身上兩顆點，原來是令港人如此驚訝。「初嚟香港時，成日認為港人好國際化，無論衣着或打扮都好追得上國際潮流，仲以為佢哋接受新事物程度會好大。但當我每次行騷着透視裝或者好性感，騷後都會被記者問好多尷尬問題，第二日報紙標題總離不開咩嘢『點綴』、『點壓』，再併埋我個胸嘅大特寫……之後我都盡量避免，可以嘅話都行騷戴bra。」笑言因近年行騷經常透點而儲齊「廿一點」的Mikki說。
性感酬勞高
Mandy也大表認同的表示，發現無論女星或模特兒，只要性感騷身材，就能輕易成為頭條人物，她說：「我影廣告多，真係好少行騷，但出席活動如果着件tube dress，緊身一啲，大家就會好注視。初時我都好唔慣，又唔係無着衫，只係尊重個場合。但係香港文化可能就係咁，我都知道有時因為着得性感啲，酬勞都會高啲。」
向來Mikki和Mandy不但大方公開戀情，更甜蜜的大談自己的另一半，二人同樣認為公開戀情，不會阻礙工作。Mikki說：「我同男友Sunny都係做呢行，好難會無人知，哈哈！模特兒唔同明星，唔需要畀fantasy畀大眾，同埋拍拖係開心事，大家關心問起，我都唔介意講。」
模界現斷層
至於和陳柏霖拍拖年餘，愈愛愈甜的Mandy則說：「初時都會有壓力，加上柏霖係拍戲，形象都緊要，因為唔知出面點睇，但之後發覺大家好似都好接受我哋，有時我仲畀人笑我個樣太冧！但我唔介意提佢，拍拖係開心事，唔係刻意宣傳就無問題。」
新模湧現，Mikki認為模界現在開始出現斷層：「其實由琦琦開始，直到我呢一代，已經有一定嘅水準，但之後已經好少真係具水準嘅行騷model。」Mandy則自言雖只是廣告模特兒，但也認同Mikki的說法，更笑說：「所以我覺得Mikki好專業，真係好仰慕佢，所有大騷都有佢份，真係好想好似佢咁行得咁好。」
當觀眾透明
被Mandy讚得心花怒放的Mikki，即場過兩招給這位後輩，「行騷最緊要係當下面啲人透明，目光保持水平線，當前面有塊鏡照住行就OK。平時有朋友睇騷叫我，我都完全聽唔到。」語畢Mikki也禁不住大讚Mandy，「我生得高大，成日畀人有種優雅感覺，我都好想似Mandy咁可愛，佢嘅笑容好甜，好有陽光味。」Mandy則說可愛是裝不來的：「可能我係個好直接嘅人，咩都要知要問，唔會掩飾啦！」
香港女性重保養
同為瑪花纖體代言人的Mandy和Mikki，異口同聲認為香港女士特別注意保養身材。Mandy笑說：「我初嚟香港時，見個個女仔都好fit，即刻覺得馬來西亞嘅女仔又矮又肥。」Mikki則說過往自恃是上海人，皮膚白滑得天獨厚，「以前落妝後，面都唔洗就瞓，之後塊面愈來愈黃。同埋我慣咗食好多肥膩嘢，所以做代言人認識多啲之後，就覺得飲食習慣真係要改。」
唔介意公開戀情
論當今模界，除了熊黛林跟郭富城的戀情如花似霧外，不少模特兒也不介意公開戀情。老一輩有琦琦、馬詩慧，今有樂基兒等，當中不少模特兒更以情侶檔齊齊搵銀，包括Jocelyn和老公Anthony、Cara G.和男友Jesper等，最近就連吳嘉龍也常偕同女友一起出席活動搵銀。
採訪：Winnie Choi
攝影：馬永堅
場地：瑪花纖體