絲絲講場：滙控大班新辦公室曝光
滙豐控股（00005）大執位！今次講緊嘅係辦公室位置，並非人事。疫情之下，銀行大班都冇乜必要再有固定辦公室，滙控行政總裁祈耀年呢頭講完會將自己同其他高層「踢出」辦公室，轉個頭已經搬咗去新嘅開放辦公室，仲「打卡」放上網同大家開心Share添！新辦公室睇落同我哋普通「打工仔」嘅冇咩分別，只係枱與枱之間相當寬敞，唔知係咪為咗保持社交距離先隔咁開呢？不過，唔通同總行講機密決策又話過你知咩。
祈耀年喺網上發文講到，經歷過去一年幾嘅在家工作（WFH），一諗到返公司就要困喺得自己一個嘅辦公室入面，就即刻想搵同事面對面傾偈，同佢哋重新建立聯繫喎。家陣CEO同其他高層齊齊「搬新居」，連大房都唔坐，你估真係祈耀年等高層一時嘅「任性」？非也。祈耀年話正正係因為過去一年經歷完咁大變化，佢認為要變就快、唔好左等右等喇，因為當一切回復往常，要再變就太遲咁話。
改行混合工作模式
經此一「疫」，銀行業嘅工作模式有好大改變，銀行同客戶之間嘅往來都有好大分別，好多工作都可以網上完成，所以為咗配合未來發展，同埋畀員工做嘢時有更大嘅靈活度，祈耀年就決定將成個滙豐改變成混合工作模式。
嚟緊除咗喺分行做嘢嘅前線員工，滙豐大部分職員都可用混合模式工作。即係話高層示範完點樣紆尊降貴之後，其他員工都無藉口打退堂鼓啦，明晒！
余絲韻