做得投資銀行，人人要OT早就唔係新聞，只係有幾誇張先？絲絲聽講，有十幾個高盛嘅新進分析師每個禮拜工作接近100小時，仲要連踩幾鑊，搞到想劈炮唔撈喎！
事緣係高盛呢期進行咗一份內部員工工作環境調查，受訪嘅13名今年新入職分析師（即係3個月貨仔都冇），平均每周工作98小時，即係就算返足7日，每日都要做14粒鐘！每晚平均瞓得5個鐘，平均瞓覺時間係凌晨3點。呢啲投行天之驕子，真係表面光鮮，內裏瘋癲！
調查仲提到，所有受訪者都認同工時過長，影響自己人際關係同家庭生活。仲有75%受訪者話情況嚴重到要去尋求專業心理輔導服務。唔得佢死嘅係所有受訪者都話，經常遇到「不符合現實」嘅工作期限。總之一句，以10分為滿分，受訪者對高盛滿意度中位數得兩分，好明顯唔合格喎。
有新仔分析師話，每日除咗工作時間外，得番4粒鐘私人時間，由於工作壓力過大，遇到失眠、精神緊張等身體問題。佢哋都講到，入職之前從來冇期望可以朝9晚5，只係冇諗過原來要「朝9到凌晨5點」先收得工啫。有高盛主管都話，感受到班新仔怨氣幾重！
報告建議高盛考慮每周最多只准員工工作80粒鐘（換算返即係返5日，每日做16個鐘，都唔少吖！），同埋禁止員工周五晚9點後同周六全日繼續工作。據講，高盛管理層對呢份報告極為重視，更同嗰班新仔會面，仲話會增聘人手喎。不過，絲絲諗返，呢份調查報告又唔知係員工趕咗幾多晚通頂趕出嚟呢？
余絲韻