絲絲講場：宏利派錢鼓勵員工做善事

宏利嘅「另類捐款」認真有創意！今年環球經濟真係充滿挑戰，為咗鼓勵員工宣揚大愛，宏利就諗到向全球3.5萬名員工着手，向每人派出大約50加元嘅慈善資助，而2,400名香港及澳門員工，就會喺今個月內收到約320港元嘅資助，員工可按自己嘅心水，捐錢或物資畀有需要嘅群體或機構。

宏利諗得好周到，佢話考慮到香港人愈嚟愈關注健康，加上香港出現新一波疫情，長者會比其他人有更大的抗疫需要，於是同香港兩個慈善團體成立咗捐款項目，鼓勵員工善用款項去支援弱勢社群，捐款項目包括認購「宏利節日健康福袋」捐贈畀基層長者。

另外一個捐款項目就係同小朋友有關，員工可以透過兒童心臟基金會，直接資助負擔唔到醫療費用嘅小朋友，協助佢哋購置治療器具。尤其是每年香港都有成500個兒童需要接受心臟專科治療、手術等等，醫療費用都幾費（口架）。

宏利仲鼓勵員工喺社交媒體分享關愛故事，絲絲聽到都覺得好有愛啊！不過，宏利點知道員工最後有無將資助捐出去呢？

余絲韻