絲絲講場：股神旗艦狂轉倉惹遐想
喺新冠肺炎疫情影響下，有「股神」之稱嘅巴菲特投資旗艦巴郡（Berkshire Hathaway）今年多次調整投資組合，市場大跌眼鏡。事關巴郡今年首9個月，共有35隻持股被完全清倉或減持。而「股神」過往調整投資組合時，無論是增持、減持或清倉，都只係小量調整。不禁令人猜測，莫非「貪新忘舊」嘅並非「股神」，而是另有其人？
外界估已交副手操盤
外界就估，巴菲特已將巴郡嘅操作重任，交畀投資副手Todd Combs同Ted Weschler。呢個講法並唔係空穴來風，因為今年巴郡多個投資決定都同巴菲特嘅作風180度相反。包括一向唱衰黃金嘅巴菲特，今年竟然買入黃金開採商Barrick Gold；佢亦講過無意鑽研臨床數據，但上季巴郡就重注多間製藥公司。仲有！巴菲特講過唔會投資新股，但巴郡喺今年買入Snowflake新股，完美體現咗「今天的我打倒昨天的我」！
睇番巴郡報告，發現公司今年首9個月已同10隻股票完全「割席」，包括多隻航空股、好市多（Costco）等。同時，有25隻股票被減持，當中包括次季先建倉嘅Barrick Gold，喺第三季就減持逾40%。要知道巴菲特出名「長情」，鮮有短炒，大家可能會諗起佢其中一個經典長線投資之作，就是2003年沙士肆虐之時低買中石油（00857），揸超過4年先賣出，用5億美元本金就創造近40億美元利潤。
究竟喺金融市場叱咤風雲半世紀嘅巴菲特，係因為探知到宏觀經濟風向變化先轉軚，定係巴郡已改朝換代呢？絲絲就覺得，咁易畀你估到就唔叫「股神」！
余絲韻