內地科技發展迅速，電子支付、5G以至人臉識別技術都企喺前端位置，甚至惹來美國嫉妒。不過，估唔到內地科企對於印章文化及法定地位嘅認同依舊無變，可以話「一章在手，天下我有」！仲因為一個印章搞出唔少鬧劇，甚至鬧上法庭！
曾有「中國亞馬遜」之稱嘅內地網上書商噹噹網，由李國慶同俞渝夫婦共同創辦。不過，兩人鬧離婚，男方為咗重奪公司控制權，喺今年四月下旬到咗北京公司總部，用鞋盒裝走約50個公章。
第二日李氏喺微博發文，表示自己貼身保管呢啲公章，仲喺網上發布印有噹噹公司公章嘅文件，話老婆唔再擁有公司控制權。俞女士隨後透過傳媒發聲明，話李氏攞走嘅印章已正式報失，文件暫時失效。而事件仲未完，可以見到內地公司文化，無加蓋公章印嘅文件就無咗法律約束力。
另外，騰訊控股（00700）曾喺內地入稟告著名辣椒醬公司老干媽，話佢未畀廣告費，要求凍結230萬美元資產。經過調查後，警方證實，三名持偽造老干媽公章嘅人冒充公司代表，同騰訊簽署相關廣告協議。最後兩間公司聯合發聲明，而騰訊撤回對老干媽嘅訴訟。
其實內地對公章嘅大細、篆刻等有嚴格規定，但公章實在太易偽造。雖然一直有人建議用電子印章等代替公章，但暫時仍難以實行。就算走在科技尖端嘅內地巨企，都未能同傳統印章講Bye Bye！
余絲韻