中美轉眼間變得劍拔弩張，但環球股市似乎暫時冇乜嘢，尋日港股仲升咗205點，收報25,263點，惟成交金額縮至1,405億元。
照咁嚟睇，個市暫時又唔死得，始終短期內仲有螞蟻集團、中概股排隊上市。不過，依家局勢轉趨緊張，各國於南海「晒肌肉」，會唔會擦槍走火成為普遍投資者的夢魘，大戶再如早前般大手買上的場面應該會消失，成交金額將會縮，料以上落市為主，波幅介乎24,800至25,600點，重回炒股唔炒市的狀態。為咗謹慎起見，炒上落都要控制注碼，嚴守止賺及止蝕。實在過於擔心時局，不妨趁反彈時減少持股。
老古建議千祈唔好掂本地地產相關股，包括收息股領展房產基金（00823）。該股已跌足一年，降軌由去年七月延續至今，加上本地經濟滑鐵盧，在本港經濟見到曙光之前，應該都好難有運行。走勢方面，領展昨收報59.05元，低於所有日線，技術指標未見改善，未來關鍵是守住前低56.25元，否則再下一級可能要50元才有大支持。
古勝