Market Insight：手機設備股格局待變

七月有三大利淡因素

講番港股，上周恒指高低波幅大約1,000點，上周一最低下試23,684點，其後回升，周二至周四橫行收窄，周五則重回24,600點樓上，全周低開高收，仲有成交配合，短線走勢仍然值得期待，重上25,000點亦唔難。

不過，今周臨近期指結算，料轉倉活動增加，下個月開邊瓣都未知，都係唔好咁進取，反正向上空間有限。正所謂人無遠慮必有近憂，老古就分析一下七月份的三大利淡因素。

首先，新法有機會正式在港推行，屆時各國的反應對香港前景有至關重要的影響。其次，大型中概股在香港第二上市暫告一段落，雖然未來仍會有其他中概股回流，不過規模或影響都不及阿里巴巴（09988）及京東（09618），對後市的支持自然都打咗折扣。最後，下筆之時，中印兩國仍未就流血事件協商出結果；但以近年民族主義大行其道，相信呢件事唔會咁易解決，會唔會變成重大外交、經貿，甚至軍事衝突仍係未知之數。

做定對沖 坐貨更安心

老古唔係想嚇大家，而係做定最壞打算，亦係近排最流行講嘅底線思維，計好最壞情況會輸幾多的打算，到時就唔使騰騰震喇。有貨唔想走，不妨做定對沖，咁樣坐貨會更安心。而無貨就梗係穩坐釣魚台，等待執平貨、甚至追沽的機會。

值得一提的是，上周五個別手機設備股發力追落後，主因有報告話，蘋果公司喺400美元以上的中高端手機市佔率第一，刺激瑞聲科技（02018）升逾6%，收報46.45元。純睇技術面，瑞聲升穿雙底頸線44元向上，短線配合成交阻力位在50元，20日線支持位在42.2元。

至於丘鈦科技（01478），上周五亦都升近2%收報10.4元，該股正處於大型收窄三角形中，待變格局明顯，不如靜待真正突破後再追入。舜宇光學（02382）的走勢則相對差，雖然都收窄三角形待變形態，不過上方阻力頗大，上周五跌逾1%收報114.1元，下方宜守100元大位。

展望本周，關鍵的數據不多，周一有香港五月綜合消費者物價指數；周四港股休市日，美國會公布五月商品貿易帳；周五亦有美國五月個人消費支出物價指數。最後，老古再提一提大家，愈係臨近十一月的美國總統大選，港股面臨的風險有可能逐級遞增，盡量做好防風措施不為過。

古勝