絲絲講場：畢業生如何度過「疫」境？

庫克：勇敢面對 自我檢討

庫克話，疫情雖然係前所未有嘅挑戰，但畢業後嘅人生總係充滿困難，危機亦有機會係轉機，只要保持希望，勇敢面對，就可以創造比想像中更好嘅未來。

佢語重心長咁講，每個年代都有難題要面對，生活總會令我哋受到挫敗同不滿，但我哋必須了解到，自己唔係人生嘅唯一作者。庫克仲感性咁講，當我哋將人生規劃得好詳細、好豐富嗰陣，人生總唔係順住心意而行。佢記得自己九八年加入Apple，同「教主」喬布斯一齊工作感到無比興奮，後來「教主」離開，喺呢個世界留低咗好多正面影響。

庫克總結話，與其持續詛咒人生困頓，不如好好檢視自己所有嘅人、事同物，對一切抱住感激嘅心，並勇於幫助有需要嘅人。

奧巴馬：唔使驚 做正確嘅事

而奧巴馬亦分享，畢業亦標誌着年輕人踏入成年，如果世界能變得更好，將取決於你！佢畀咗畢業生三個建議：首先係唔好害怕！美國之前曾經歷更艱難時期，例如奴隸制度、南北戰爭、饑荒、疾病、（1930年代）經濟大蕭條同911事件，每次挫折令人更強大。第二係做你認為正確嘅事！如果只做自我感覺良好、方便又容易嘅事，咁只係小朋友嘅想法。年輕人要以持久嘅價值觀為基礎，例如誠實、勤奮、責任、公平、慷慨同尊重他人。第三係建立一個團隊，因冇人能夠獨自做大事！

其實世上每個人本來就有自己嘅發展時區，身邊有啲人好似走喺你前面，亦有人好似行喺你後面。唔使嫉妒或嘲笑，其實每個人都喺度「做自己」，你都係！而事實上，美國前總統奧巴馬55歲就做完八年總統退落嚟，但特朗普70歲先開始做總統。

絲絲希望各位畢業生或年輕人睇完後都可以思考一下，依家經濟低潮時期，某啲人只係諗住逆市創業。對股民而言，股市低潮正是入市之時，高低起伏係人生必經階段！

余絲韻