Market Insight：內地航空股具短炒空間

事實上，近排的確有熱錢流入香港，港元不斷觸及強方保證。且資金進入輪流炒作的狀態，只要係落後板塊，唔理好醜點都會有不俗升幅，其一是內地航空股。

老古唔多睇好內地航空股皆因中線來看，受新冠肺炎肆虐影響，全球旅遊出行大為減少，就連疫情受控的內地，航班客運量亦都大受影響，更遑論海外；貨運亦都因為物流及需求減少的關係而大跌。

熱錢湧入不利淡倉

至於長線方面，疫情經已改變人們的習慣，以往需要搭飛機的出差行為都可免則免、以視像會議替代。航空業要回復舊觀真係遙遙無期，更何況仲未計及中美衝突對經濟的影響。早前就連股神巴菲特都沽售美國航空股，中資航空股有甚麼條件獨善其身？

有人可能會話，刻下炒緊經濟復甦，莫要太悲。老古則覺得要有疫苗面世及充足供應，經濟先會真正復甦。不過大行看法不太悲觀，滙豐環球研究指，內地上周民航日均客座人數已達到去年54%水平，相信中資航空股將可在全球同業中率先復甦，重申對三大中資航空股的「買入」投資評級。

睇番走勢，中國國航（00753）、南方航空（01055）及東方航空（00670）的技術面都差唔多，技術指標有好轉，三者形態都似足雙底回升，目前正向上挑戰頸線。雖然老古中長線唔多睇好，不過短線喺熱錢流入下，可能仲有炒作空間。

展望本周，內地周二公布首五月的實際外商直接投資，和五月貨幣供應及新增貸款；周三則有中美兩國的五月消費者物價指數，具體反映全球首兩大經濟體的狀況。不過眼前係資金市，對利淡消息未必有太大反應，六月半年結班芬佬好樂意順水推舟做番好份成績表，老散唔信升市都咪亂沽！

古勝