港股昨日高開低收，雖然都有40點進帳，但24,600點樓上明顯缺乏承接力，目前最好的預期係港股短線喺24,300點徘徊整固，下周配合好消息再炒上。喺中概股熱潮散去前，港股短線仍然值得期待。
不過，一味富貴險中求並非致勝之道，尤其係今年正值多事之秋，隨便一個壞消息來襲都可以即刻大瀉過千點，呢幾個月已經領教過唔少次，因此缸邊友要自己控制注碼，小心高追風險，同時慎防震倉。目前有貨在手仍然可以坐多陣，謹慎者可以做少少對沖。
個股方面，可以留意相對落後但頗具前景的金山軟件（03888）。集團主打開發網絡及手機遊戲，同時提供雲存儲及雲計算服務，都係目前炙手可熱的新經濟行業。早前集團主席雷軍指，疫情加速了所有行業的數碼化轉型及網上協作，為公司未來發展建立良好基礎。
再參考大行睇法，高盛看好該集團旗下的金山雲業務，指其首季業績穩健、毛利改善，首季收入按年升64%至13.91億元人民幣，其中個人及企業客戶收入分別升58%及119%，予金山軟件「買入」評級，目標價睇31元。
最後睇走勢，金山軟件四月底建議發行31億元可換股債券後，股價調整至五月初的25.6元見底，其後隨着金山雲於美國上市，公司股價扶搖直上高見30.5元。該股近日又再調整，昨日收報25.25元，大跌逾3%，或是趁低收集機會。
睇好其前景者，可待其重回三月底至四月中的橫行區間24至25元之間，才落第一注，短線上望28元，向下跌穿23元則止蝕。
古勝