尋日港股再度挑戰24,500點不果，高低波幅逾300點，最終收市跌逾100點，報24,280點，除咗波動比早兩日大，成交金額更增至1,242億元，對後市係咪有啟示？筆者暫時維持港股短線冇大冧之虞的睇法，始終兩會期間維穩大於一切，預料港股仍會相對穩定，選擇坐貨的缸邊友可以定啲嚟，唔使咁慌住！
至於現階段入市買貨，最緊要避免高追，就好似早排熱炒的生物科技及醫療器材股，尋日齊齊跳水，如康希諾生物（06185）、春立醫療（01858）及沛嘉醫療（09996）等股價都大幅回調。對於升幅過巨的個別板塊，短線亦非一帆風順，因此現時入市一定要嚴守止蝕位，且要小賭怡情。
眾安在綫（06060）是可以考慮的股份之一，該股早前公布首四個月所獲得的原保險保費收入總額逾42億元人民幣，按年增加20%；雖然較一月至三月份的增速放緩，但是該公司線上業務的銷售模式食正時下避免接觸人的潮流，令其受新冠肺炎疫情影響較少，亦對日後營運有利。
再睇走勢，該股三月十九日跌至22.75港元見底，其後營造小雙底升穿頸線28元水平，股價最高見31.1元；而該股本周開始調整，最低見27.3元，調整幅度唔細，建議於28元水平小注入市，短線上望33元，向下跌穿26元止蝕。
古勝