Market Insight：物管股勝在大樹好遮蔭
美國總統特朗普近來言論愈加敵視中國，睇嚟未來一段時間都好難有安樂日子過，缸邊友要打醒十二分精神。依家繼續喺股市入面博，賭嘅就係美國仍然在疫情高峰期，暫時唔敢輕舉妄動。而另一個短線支持就係周內召開的內地兩會，市場憧憬財政政策支持國內經濟穩定，雖然成效有待觀察，料短線應有刺激作用。
上周五港股跌穿23,800點關口，下一個關鍵位就係四月二十二日的低位23,483點，若跌穿埋將破壞三月十九日21,139點起構築的升軌，到時就要考慮係咪要清貨。
受惠母企持續開發樓盤
話說回頭，就算環球局勢兇險萬分，但係都唔會一沉到底，中間梗有反覆。股民可以留意一向強勢的物管股，該板塊最大優勢是生意集中內地物業管理，不愁外圍影響，且有母企持續開發樓盤從而增加管理面積，服務業的本質算是輕資產的一種，現金流強，防守性較高。
當中規模及市值最大的碧桂園服務（06098），上市兩年股價屢見新高，目前股價貼近10天線向上，且所有移動平均線上揚，進取者可吼低小注買入，上望40元，跌穿20天線35元止蝕。至於細細粒的奧園健康（03662），新近併購浙江省的物管業務，刺激上周五股價見52周高，短線有消息支持。屬國企背景的中海物業（02669），股價仍處高位，惟近日走勢較弱，且RSI見熊背馳，有可能率先調整，宜待跌定後再入市。至於市盈率較低的佳兆業美好（02168），突破早前31元阻力位後急升，予人高處不勝寒之感，不如考慮頭兩隻為妙。
古勝