絲絲講場：財俊留家脫「毒」有法
疫情下大家多咗留喺屋企，股評人有咩解悶新玩意？大中華投資策略研究學會副會長（港股）李偉傑（Jason）成功挑戰DIY韓國人氣「400次咖啡」；艾德證券董事總經理陳健豪（Aaron）就買咗個乒乓波訓練器返屋企練波。兩位財俊一動一靜，希望宅在家一樣咁精彩！
李偉傑整「400次咖啡」
近期韓國一款「400次咖啡」爆紅，鍾意下廚嘅Jason亦要挑戰吓，憑着佢嘅摩打手，一Tick成功，太太讚口不絕！佢話必須採用靚嘅齋啡粉，同埋精準量度1:1:1嘅砂糖、齋啡粉同水。佢曾試用三合一嘅朱古力粉代替齋啡粉，發現係整唔到超綿密奶泡嘅效果。至於網傳手打400次係唔夠，Jason就計計時，發現以男人臂彎攪拌嘅速度，大概6分鐘就成事。女士們不如用打蛋器，一分鐘多啲就搞掂！
喺疫情期間，佢每逢周末都會下廚煮西餐或中菜畀屋企人食，坦言廚藝進步神速。Jason仲喺YouTube開咗個頻道「Jason教煮」，畀阿仔大個之後重溫番，並傳承到佢嘅廚藝！
陳健豪練乒乓波氹囡囡
Aaron喺疫情肆虐呢段時間，都要繼續返工，但時不時就會帶啲小Surprise氹囡囡。近日佢就買咗個乒乓波訓練器，佢話係買畀無得返學嘅囡囡解悶外，自己都好想玩！
執起乒乓波拍，令Aaron諗番起那些年。佢喺大學係乒乓球校隊，經常出賽而接受高密度訓練，每周差唔多練三次，每次兩至三個鐘。但畢咗業之後，就好少再打，偶爾先同啲金融行家搓吓波。佢笑住話，呢個乒乓波訓練器畀佢過吓癮，可以自己一個「毒」打。疫情後，希望約啲大學朋友仔出嚟打番場波。
余絲韻