絲絲講場：超購王首掛 敲鑼要延期
昨日「黑色星期五」，兩間公司繼續如常掛牌上市，可謂膽識過人！絲絲喺上市儀式上，只見得一隻鑼，而兩間公司理應有兩個鑼，畀公司管理層一齊嚟敲，心諗莫非有新安排？原來係錄得超額認購1,947倍嘅「超購王」物業管理股燁星集團（01941）管理層無咗影！
煜盛主席螢幕「到賀」
據了解，香港交易所（00388）好貼心，知道受新冠肺炎疫情影響，交通受阻，導致上市公司管理層未能到港，於是容許有關公司申請延遲進行上市儀式。燁星就申請延期搞儀式，至於延遲到幾時？就要問吓新冠肺炎了。
而同日上市的煜盛文化（01859）管理層一樣嚟唔到香港，但就委託咗非執行董事黃偉德同投資者之一嘅Cinemetic Investment執董楊洪鈞幫手敲鑼。主席劉牧都有錄咗段片同嘉賓say個hi，仲講明上市之後，會努力做好業務，回饋投資者。
所謂時也命也！昨日兩隻新股遇正小型股災，表現自然失準！原本大家諗住「超購王」燁星應該升幾成，點知昨日港股一度重挫，結果隻股最終只係升得10%，一手唔計手續費賺得320蚊，但喺咁嘅市況下都算對小股東有交代啦。
另一隻煜盛文化就比較慘情，一路都無乜浮過上水面，結果收市都跌7%，一手唔計手續費微蝕一百六十蚊，小股東都算執番身彩！
余絲韻