絲絲講場：騰訊逆市加碼「雲端」請人
新冠肺炎仲要搞幾耐無人知，但可以肯定嘅係騰訊（00700）上周五（六日）宣布啟動春季招聘，除咗喺學校請超過3,000名Intern（實習生）之外，更加會公開請超過5,000人，全年計招聘數量「將比去年提升25%以上」！
據企鵝微信公眾號話，整體嚟講一半Intern可以留低，尤其係銷售門市部，校招生100%從實習生轉正留用（學徒轉正不是夢）。
面試等環節均線上進行
不過今年社會公開招聘嗰批5,000幾個職位同往年有一個好大嘅不同——就係多咗好多關於騰訊抗疫服務嘅產品。企鵝話最近緊急推出咗一系列新型抗疫產品，例如遠程辦公、健康碼、乘車登記碼等。所以騰訊醫療、騰訊會議、企業微信、微信搜一搜與小程序、騰訊智慧教育、騰訊智慧政務等業務依家都要滾水淥腳請人。
除此之外，其實騰訊研發部門仲擴大咗，例如騰訊雲喺西安同長沙等地組建咗研發中心。
另一樣同往年好唔同嘅嘢，當然係騰訊講明今鋪唔使有志者親身面試，「所有筆試、面試環節均在線上進行，只要有電腦有WiFi就能參加。」
聽起嚟就簡單好多，不過係人都知，要入去謀番一官半職絕非易事，不單止因為企鵝係全世界數一數二嘅科技公司，而且福利多多，撇除日常穿梭車接送、辦公椅高檔舒適、食堂茶水間、健身運動等呢啲枝節嘢唔講，至至至緊要係提供首次置業免息貸款，一線城市安居貸款額度成大嗱嗱50萬元人仔！
這些機會……話唔埋要去到總裁劉熾平（一九九○年香港會考9A狀元）咁嘅級數先得lu！
余絲韻