Market Insight：獅王股價低迷4大原因

咁啱兩國又係全球最大嘅兩個經濟體，對其他國家經濟影響可謂無遠弗屆，呢次危機最後會點收科？真係天知道……

全球經濟都唔掂，大家身在的香港作為一個開放型的細經濟體，又點可能獨善其身？講咁多，都係想提提大家，喺逆市投資，謹記持盈保泰，以待日後真正撈底。

回購計劃宣告結束

而香港經濟前景黯淡，被稱為「獅王」嘅滙豐控股（00005）都要遭殃，而且滙控自身有四大原因令其股價長期萎靡不振。其一，自然係實行多年的回購計劃宣告暫時結束，老實講，過去幾年一直回購撐股價都要跌，更何況停止回購？

業務過分依賴中國

其二，中港兩地業務早已是滙控盈利重心，集團已由跨國大行漸漸蛻變為地區性銀行，格局矮化之後嘅結果就是與中國的命運休戚與共。而近年中國經濟每況愈下，GDP增長由「保八」、「保七」、「保六」一直向下，而今年則因過去兩年的中美貿易戰摧殘，再加上年初至今的新冠肺炎，能否「保五」都唔知，咁滙控未來盈利能力有幾好，大家都心中有數喇！

息差收窄 影響收入

其三，美國聯儲局上周突然大幅減息半厘，而且短期內仲有機會再下調0.25至0.5厘，息差收窄自不然影響滙豐收入。

臨時CEO仍未坐正

最後，正所謂「蛇無頭不行」，更何況係一間大型銀行！該集團行政總裁一職懸而未決，臨時行政總裁仍未坐正，究竟係大股東之間未有共識，還是賢能之士無意接呢份燙手山芋？

早前，大行花旗重申滙豐「沽售」評級，下調今年至二二年的每股盈利預測。老古自然估唔到滙豐最終跌到去咩價位，但當年令女股評人落淚的33元會否重現？大家不妨拭目以待。

展望本周，周中將會公布中、美兩國二月份消費物價指數，屆時能根據物價通脹情況，預測兩國再度減息、降準，甚至是量化寬鬆力度。而再次重新放水，能否解決現下所有經濟問題？老古心中存疑，你呢？

古勝