Market Insight：大注入市坐貨風險高

資金繼續托市保港股、A股，以營造眾人皆醉嘅太平盛世氣氛，缸邊友醉埋一份，限注短炒個股波幅，繼續炒股唔炒市，並無不可，但切忌大注入市坐貨，避免疫情一旦失控而損手爛腳。

二線科網股有鑊氣

講起近日當炒股，自不然要數到一批二線嘅科網股及新經濟股。現時內地進行大規模封城，逾30個城市陷入停頓狀態，雖然人人留在家中、外出受到限制，但生活總要繼續，因此安坐家中仍可工作、學習、手遊及購物消費嘅概念股，紛紛扶搖直上。

其中具備遠程辦公室概念嘅金山軟件（03888），過去一周由低位彈升逾2成，未來極大機會挑戰一八年頭的31.1元高位。同時兼具網上教育及手遊股的網龍（00777），走勢與前者不遑多讓，過去10個月營造圓底向上，升穿頸線後股價一飛沖天，下一較大阻力在30元。

至於早前提過候低吸嘅微盟集團（02013），股價調整至4元水平見支持，上周股價彈逾3成，走勢趨升，若未來由高位回落至5元邊現承接，可考慮再低吸博上。

展望本周，中國將於周一公布一月份消費者物價指數，惟未知會否如上周五的進出口數據般突然取消；周四、周五則有美國公布一月份消費者物價指數，以及二月份密歇根大學消費者信心指數。數據均對經濟走向有啟示，尤其係面對猖獗的疫情，所以老古再提提大家，小心運用手上籌碼，謹記逆市中保本比賺錢緊要。

古勝