醫藥股喪炒 提防接火棒
新春假期後港股開局不利，上周連跌三個交易日，累挫逾1,600點。相信A股開市後，仍會拖累港股進一步尋底，對於想買貨嘅股民，老古都係認為「莫買當頭跌」，唔好心急撈貨。
自從武漢肺炎爆發，甚至蔓延全球，疫情已經變成主導環球股市嘅重要因素，目前仍未見到內地疫情有收斂迹象，距離受控仲有排等。內地首季經濟增長大幅放緩是可以預見，試問中資股比重獨大嘅港股，仲邊可能有運行？
話說回頭，疫情肆虐之下，卻有細股成為逆市奇葩，講緊嘅正是二、三線醫療股。最初由少數具有抗疫概念嘅細股掀起熱潮，如中國醫療集團（08225）過去三個交易日股價一度勁升。最後卻變成唔少細價醫療股雞犬升天，中國先鋒醫藥（01345）上周五曾升1.8倍見2.55元，最後升幅縮窄至1.05倍。
不過，同日有唔少同類細股炒燶，大健康國際（02211）及精優藥業（00858）股價都冧超過四成，高位接貨已經重創。
新經濟5G手機設備值博
提及上述股份並唔係建議大家去尋寶，而係提醒唔好買貨，因為無人知音樂椅遊戲幾時停。缸邊友不如坐定定，等待早前熱炒嘅新經濟股、5G概念股及手機設備股完成調整後，在低位分注吸納，值博率反而仲高。
睇番本周，中國今日公布去年全年規模以上工業企業利潤年率，周二澳洲發表二月央行利率決議，周五則有美國一月失業率及非農就業數據。數據值得參考，但相信市場會較關注疫情發展，在得到有效控制之前，港股就算唔繼續下跌，都會以整固為主，急於入市博反彈隨時有排捱，不如等到股市企穩再入市都未遲。
古勝