絲絲講場：風水指數報喜 金鼠大利恒指
股民喺嚟緊嘅鼠年有咩部署？中信里昂證券發表最新二○二○年風水指數，指來年為金鼠年，八字同屬土雞嘅恒生指數「和諧相處」，料對恒指係「大吉之兆」。
該行預測，今年農曆新年開局唔錯，料首季將會有一系列政策出台改善營商環境。踏入初夏，即四至六月，恒指將迎來牛市，其升勢維持到八至九月。屆時將步入調整周期。但喺部分行業推動下，年尾表現唔會太差。總括而言，鼠年港股走勢為「靠穩向上」，八至九月為全年高位。
「西北」「東北」樓市最佳
選股方面，該行話今年五行屬金，而土生金，土同金好夾，所以最旺係與土相關嘅房地產同資源板塊，惟夏季或偏軟。其次係屬金嘅金融、機械同銀行板塊。屬木嘅醫療衞生及消費品板塊同樣被睇好。至於屬火嘅科技、電訊及公用事業板塊，因火剋金，年內可能有啲麻煩，若要投資嘅話，估計夏初會升啲，十月同十一月升幅會更明顯。
今個鼠年八字圖上基本無水，但由於金生水，所以屬水嘅行業中，較睇好物流公司，旅遊業亦會前行，但航運或略微下行。
至於樓市，指標話最佳方位為「西北」同「東北」，要迴避方位為「正北」、「正東」及「正南」。
余絲韻