作為上市企業，蝕錢唔係新鮮事，但如果一年蝕嘅錢係市值嘅兩倍，咁又唔同講法！據絲絲所知，舊年有間內企或會創下Ａ股「蝕得最甘」紀錄，就係青海鹽湖工業（ＳＴ鹽湖，000792.SZ）。
呢間公司舊年全年可能蝕達四百七十二億元（人民幣‧下同）！虧損幾乎係佢市值兩倍，亦等同青海省ＧＤＰ（當地生產總值）嘅一成四！
ＳＴ鹽湖工業早幾日預警舊年巨虧，比一八年蝕多十二點七倍！市場嘩然，事關虧損額不單創Ａ股舊年之最，甚至刷新埋歷來蝕得最甘紀錄！睇番一四至一八年，Ａ股「虧蝕王」分別係中國鋁業、酒鋼宏興、石化油服、樂視網同埋天神娛樂，佢哋只係虧損七十一億幾到一百六十二億元不等。
呢間公司係內地鉀肥業龍頭，九七年上市以來連賺十九年，幾咁風光，但一七年業績逆轉，之後年年都蝕錢。
ＳＴ鹽湖話，今次虧損主因係「重整進程中因資產處置預計產生損失」約四百一十七億元，簡單講即係剝離不良資產引致巨虧。不過深交所唔多收貨，即刻出關注函要公司解釋，又睇吓佢哋點解畫。
余絲韻