絲絲講場：日企缺人才 有錢都執笠
公司執笠唔一定係因為缺錢，日本企業因「缺人」而破產嘅數字，舊年就創咗新高！
日本信貸調研機構東京商工研究（Tokyo Shoko Research）調查顯示，舊年當地因「缺人」或相關問題而破產嘅企業數目達426家，為一三年有紀錄以來新高，按年增約10%。
63%無人揸Fit焗收檔
因請唔到足夠人開工，而無辦法做落去嘅日本公司，舊年有78家，比例達18.3%；搵唔到人手替代退休或轉職員工而被迫結業嘅，亦有44家，比例約10.3%。
不過講到最缺嘅，唔係員工，而係老闆或話事人！因負責人退休，但又冇人可以或願意繼任而被迫摺埋嘅日本公司，舊年有成270家，比例高達六成三！反而，因無法應付勞動成本上升而破產嘅公司得34家，比例只得7.9%！
至於「缺人」嘅重災區，係服務業同建築業，分別有128家同77家要關門，合共佔咗總數近半。
當地人口危機嘅嚴重程度，已經唔只係便利店請唔到人而無法24小時營業咁簡單！就算有財，但係若然冇人才幫手，啲公司一樣會執！
余絲韻