絲絲講場：保險箱亂世搶手 年租貴達2500萬
世界各地保險箱需求最近激增，皆因有錢人一來驚打仗及全球經濟衰退，寧揸Cash揸金揸珠寶，二來唔少國家現時負利率，存錢入銀行冇息收兼要畀手續費，現兜兜鎖喺保險箱畀租仲平。
早幾年銀行保險箱數量係咁跌，部分原因係年輕一代將啲文件以電子形式儲存，唔似得上一代會將大疊樓契一綑綑放保險箱，於是唔少銀行索性唔再有呢樣服務。
不過近年情況逆轉，保險庫專營公司Swiss Gold Safe話需求自一八年夏天開始激增，另一間喺瑞士蘇黎世有保險箱出租嘅貴金屬經銷商Sincona亦話，3年幾前仲大把吉箱，依家就每日租出至少5個，咁落去好快Full晒。
不論英國、瑞士或美國嘅大城市，保險箱都同樣渴市，由幾cm高嘅箱仔到廚櫃Size，甚至成間房咁大都有。國際金庫供應商IBV International Vaults上月開業嘅倫敦保險庫，除咗一般嘅保險箱外，仲提供房咁大嘅保險庫，共450間，房租一年250萬英鎊，即大概2,500萬港紙一年！
客戶或要額外再買保險
租來除咗放錢、金銀首飾、重要文件外，亦有人用來擺藝術品，甚至係皇冠！著名嘅17世紀「The Crown of The Andes」一五年賣畀博物館前，就一直畀收藏家鎖喺花旗銀行保險箱內！
不過，保險箱唔係毫無風險。首先係，保險庫亦有火災或被竊等危險，5年前倫敦就試過有賊鑽穿地下保險庫嘅牆，一個唔該偷走咗1.6億元財物，所以保險箱亦非萬全，啲有錢人可能要額外再買保險。仲有係，大批現錢同金條，點樣安排運送入保險庫而又唔會惹起歹徒注意？
另一大問題係，之後點將咁大筆現金存番入銀行戶口，又唔會令銀行懷疑閣下洗黑錢而踢你走？Anyway，計絲絲話，Happy Problems啫！
余絲韻