Market Insight：煤氣勢反覆 勿急撈貨

內地A股走勢持續向好，盛傳春節前人行會降準，但老古對內銀股始終有保留，要追就追券商股同內險股。除了之前提及的中金公司（03908）之外，中信証券（06030）及海通證券（06837）都可以留意。而內險股中，中國人壽（02628）走勢圖顯示，股價正醞釀突破，可小注一試，今浪博上23元樓上，穿20.5元止蝕。

唔少股民長揸住中華煤氣（00003）收息兼收紅股，亦好幸運地喺上半年高位18元水平沽貨獲利。依家股價落番15元水平，係咪撈貨機會？

市底偏強 可坐貨過節

煤氣股價自今年八月失守250日線後反覆向下，一度跌至14.5元水平，從其過去的走勢可見，二○一三及二○一五年跌穿250日線之後，都要回試對上一次的底部，而眼前對上一次底在一八年十月低位約13.5元水平。到底今次會唔會見番呢啲位，不得而知，惟當其股價重上250日線，亦好大機會重上番之前的高位，目前睇喺18元水平。換言之，15元水平買入，向下穿13.5元止蝕，中長線博上番18元，唔係冇機會，但畀着筆者就傾向選擇唔使急上車，待其確認重上250日線（現處16元），才博再衝頂，咁贏面好過買嚟坐喺度捱價等運到。

本周二除夕只有半個交易日，周三元旦假期，相信交投會靜一點，惟一月市底偏好，可考慮適量持貨過假期，重申穩陣起見坐啲具流通的大價股，依家未到禾雀亂飛的大升市，別過早押注二、三線股份，始終非資金主流，無謂輸機會成本等運到。

古勝