絲絲講場：中資企業舵手卸得就卸？
今年不斷傳出中資巨企創辦人辭去旗下子公司職位，包括馬雲、馬化騰、劉強東、柳傳志……名單最近再添一位就係順豐控股（002352.SZ）董事長王衛！
順豐王衛卸任高職
內地媒體話，王衛卸任順豐控股集團商貿有限公司嘅董事長一職，由吳茜接任，而公司多位董事亦相繼退出。之但係，順豐嗰邊回應話，上述嗰間順豐控股集團商貿有限公司，並非深圳上市順豐控股旗下子公司，而係大股東明德控股投資成立嘅公司，獨立於上市公司之外營運。
佢哋又話，上述法定代表人變更同董事退出，係屬於公司日常經營決策同埋管理工作優化安排，有助提高「順豐商業」運作效率，對公司日常經營唔會有任何影響，更加唔會影響到上市公司咁話。
排隊辭工或有玄機
絲絲睇番，今年二月王衛已卸任順豐控股全資子公司順豐速運嘅法定代表人、董事長及執行董事。當時公司回應，亦係同今次差唔多。
又難怪市場呢排對「退」或「卸」字咁敏感，事關早排好似排隊咁，馬雲卸任阿里巴巴董事局主席、馬化騰又卸任騰訊微信公司法定代表人及執董、柳傳志唔做聯想控股（天津）嘅法定代表人及董事長、劉強東接連卸任京東物流等公司職務……有冇咁啱呀？呢啲玄機，又點輪到絲絲去估！
余絲韻