絲絲講場：滙豐輪后大肚Look晒幸福
一七年結婚嘅滙豐「輪后」一索得男，恭喜恭喜！滙豐環球資本市場機構客戶及財富管理聯席總監陳恩因（Kanas）喺Facebook Post咗兩張靚相，原來佢同老公Sunny Lau嘅愛情結晶品將喺明年三月出世，2+1變3，幸福滿瀉！
佢喺Facebook用英文話，兩人非常高興地（beyond excited）宣布明年三月將有新成員加入家庭，並引用咗《新約聖經》中，《雅各書》入面一句：「Every good and perfect gift is from above」（各種美善的恩賜，都是從眾光之父那裏降下）。呢個Post獲得眾多親友祝賀，「讚好」同「心心」超過400個，仲有超過100個恭喜留言。
男B明年三月出世
絲絲聽講，佢哋係一索得男，而媽咪都係喺三月生日，即係兩母子之後可以一齊慶祝生日！雖然佗緊B，但Kanas繼續有跳芭蕾舞，Keep住身體健康之餘，產後仲一定好快收到身添！飲食方面，除咗魚生之外都冇乜點戒口，生活如常。
絲絲仲八到，佢計劃留喺香港生仔，然後過去澳洲坐月，因嗰邊有夫家親人幫忙照顧。絲絲好期待見到佢嘅靚仔BB！
余絲韻