昨日港股氣氛好轉，恒指一度重上27,000點關，尾市略有回吐，收報26,993點，升397點，惟成交未見突破，僅759億元。
觀乎藍籌股表現，主要是友邦（01299）、騰訊控股（00700）及滙豐控股（00005）。執筆時傳來今日首掛的阿里巴巴（00988）暗盤價高見185元，中獎嘅都有些少袋吓。雖然大市氣氛偏好迎接呢隻巨無霸登場，但始終阿里已在美國上市，香港做價該不會太離譜，老古都係維持阿里長線唔使急買貨的睇法，中獎者記得袋袋平安。
上周四本欄提到，醫藥股石藥集團（01093）在高位遇阻回落，有胡要識食，昨日一度回落至19.6元，收報19.74元，跌1.3%。老實講，呢兩周的走勢，有點似九月份的表現。短線暫宜先觀望能否收復20日線20.5元水平，若能重返其上，整固後仍有望衝22元阻力位；惟若未能收復失地，則要提防今浪或須回試18元水平才見支持。
領展房產基金（00823）派發中期息每股1.4147元將於二十七日除淨，此前見到有搶息盤追捧，昨高位見83.6元，收報82.5元，升2.4%。
但純睇走勢，領展表現真係唔多靚仔，50日線失守250日線形成死亡交叉後，頭也不回，而100日線亦行將失守250日線，進一步確認轉弱。理論上，今浪反彈兩阻力位在85元及88元，向下初步支持仍在78至80元。始終展望本港物業租賃市道唔太樂觀，值唔值得呢啲位落場博財息兼收，就留番畀大家自己計數了。
古勝