絲絲講場：中美交易所齊動「牛氣」股民小心？

美國紐約金融區嗰隻「Charging Bull」，係當地必到景點，中國遊客唔摸過唔安樂，隻銅牛係八七美國股災後，係由藝術家Di Modica自資創作，喺八九年放於紐交所外當聖誕禮物。

之但係紐交所唔領情，報警掉咗佢，搞到公眾嘈晒，結果市政府將隻牛搬咗去現址鮑靈格林公園（Bowling Green），即係紐交所過兩個街口，一擺就三十年。

點知近排，紐約市政府基於人群安全理由，又打算將隻銅牛搬返近紐交所，Di Modica大叔同一啲當地人群起反對，今次又睇吓點收科。

A股不濟 舊牛雕塑被嫌棄

而地球另一邊嘅上海交易所新大樓最近就換新牛，內地網民都不知幾咁自豪，話氣勢勁過人哋紐約嗰隻，一洗舊牛「頹」氣咁話。

隻新牛放於上海國際金融中心門口，重點在於佢昂首挺胸、牛角向上，而且仲係紅銅色嘅！事關與香港唔同，喺內地，紅色代表升市，綠色代表跌市。

相反，現時於上海證券大廈外坐鎮上交所嗰隻舊玉石牛，莫講顏色綠綠哋唔老嚟，造型仲要係耷頭嘅，畀股民嫌棄咗好多年，A股股評紅人英大証券首席經濟學家李大霄更加多次向當局反映，彈隻舊牛「又黑又瘦、冇朝氣」。

呢隻舊牛其實都有啲辛酸，唔係首次被人郁。話說佢原本放喺上交所大堂內，聽講一二年三月有某公司總裁講咗句，牛放室內，即室字部首下面有個牛字，即係牢籠個「牢」字，仲唔困死個牛勢咁話！上交所立即從善如流，四月初將隻石牛搬出大樓西門室外，即使當日上海股市只係升咗啲啲，但股民一概入晒「牛破牢而出」數。

至於今次隻新牛，周一出場時，內地股民High爆，憧憬會頂出個牛市，滬綜指確係升咗兩日，但到周三已斷纜轉跌。難怪網民話，睇真啲，新牛得三隻腳着地，怕且A股企唔穩喎。嗱唔爭在絲絲亦多口講句，查實上交所根本仲未搬入新大樓，仍係由舊石牛守住o架……

余絲韻