恒指昨日重上250日線後，未見太大回吐壓力，並以全日高位27,547點收市，升446點，成交888億元，幾好意頭！國企指數同樣突破250日線，短線若能企穩，則不要少覷後市反攻動力。
消息面方面，有報道引述中證監官員指，會盡早發布H股全流通指引，並進一步修訂QFII及RQFII制度，以拓展境外機構投資者進入交易所債市投資渠道，並研究擴大期貨特定範圍，預計部分措施可年底前落實。如是者，年底前中資概念有望開個歡樂派對！
其實，H股全流通經已搞咗一段時間，主要是目前在港上市的H股，有分內資股及外資股，內資股只可由內地投資者或合資格國外投資者等持有，而不能在港流通買賣。若然H股落實全流通，變相令中資股流通市值大幅度擴容，要成功造就呢個場面，相信必須要在此前大炒特炒一轉，激活中資股氣氛，否則以目前經濟景氣度，只怕事倍功半，更會反過來考驗市場承接力，引發震盪。
另外，中美貿易關係氣氛似趨改善，這顯然對中、港、美資本市場氣氛起到支持作用。客觀而言，中美雙方都有實際需要維持投資市場好景，看官可順勢而為，年底前押注股市繼續向上。
個股方面，老實講，雖然騰訊控股（00700）係重磅股，但唔建議瞓身搞騰訊，反而會繼續早前提及的策略，主力押注中、港地產股；而次選就係押注內險股。睇睇隻「沉睡」多時的中國人壽（02628），由十月低位17至18元水平，反覆升至上周突破20元關，昨日高位見20.8元，走勢明顯轉強。若能突破第三季高位21元關，呢浪阻力位可以睇到23元邊，短線回吐守穩20元可留意相關輪證部署。
古勝