絲絲講場：金融人睇波 着重分「色」

啱啱周末喺日本舉行咗「世界盃欖球賽2019」決賽，投行法興係賽事嘅全球合作夥伴，佢哋就請咗一班金融界朋友齊齊喺中環睇大螢幕直播。

陳其志白衫綠褲撐邊隊？

耀才證券金融（01428）執行董事兼行政總裁許繹彬（Edmond）、大中華投資策略研究學會副會長（港股）李偉傑（Jason）、致富證券企業融資部聯席董事莊志豪（Eric）等金融人，都有去捧場。而法興證券上市產品銷售部主管阿Keith同埋副總裁蔡秀虹（Eva）身為主人家，當然滿場飛招呼賓客啦。

講到睇波嗰陣，着番自己支持嗰隊球隊波衫嘅顏色最正常。但絲絲眼見，Keith就着咗白色恤衫配搭綠色長褲，正正就同決賽隊伍英格蘭同南非嘅波衫撞到正一正，唔通佢想保持中立，兩邊都撐？

Keith就話唔係，只係咁啱隻色撞到正啫。佢話，雖然自己唔識打欖球，但都識睇球賽嘅，仲話鍾意睇欖球多過足球，節奏明快啲，而且仲緊張刺激啲，成個世界盃欖球賽都差唔多睇晒咁話。

幸好嗰日天公作美，場內氣氛熱烈，大家都趁機喺周末放鬆吓，金融人都暫時忘記股市升跌。