絲絲講場：170萬港人唔買醫保為買車樓？

話說，蘇黎世保險（香港）剛公布七月做嘅調查結果，發現27%受訪港人無買醫療保險，當中39%男士同38%女士唔買嘅理由係「無時間去理」，而四成男士及33%女士就話無餘錢買。

無餘錢買呢點，明吖，但絲絲唔明嘅係，有受訪者話寧願將錢用喺其他投資或消遣，例如有13%男士話用來買車、買樓，至於女士就有13%寧願將啲錢使喺旅遊同埋Shopping之上！

45%投保人一知半解

至於近三成無買醫保嘅受訪者，若以政府公布嘅人口比例推算（即20歲或以上嘅香港成年人約有633萬人），有超過170萬港人潛在醫療保障缺口。眾保險代理們，見到呢個缺口仲唔出動！

就算有買醫保嘅，原來亦係一知半解。有45%人話唔清楚「自付費」係乜（即索償時要自己墊一墊底）；就算話清楚乜係自付費嘅人中，有41%竟然冇「自付費較高，保費相對低」嘅概念！

呢個Concept重要之處在於，若然你咁幸福公司已經買咗團體醫療保險保埋你，已經有個「墊底」，只係你擔憂團體醫保嘅保額賠唔晒時，想自己都買份嗰陣，不妨考慮有「自付費」嘅計劃，事關保費會平啲。

余絲韻