最新調查顯示，相比去信真人上司，打工仔寧願信人工智能（AI）多啲！中國有高達88%受訪者講到明係咁諗。
美國大型軟件公司甲骨文（Oracle）與研究公司Future Workplace聯合做咗個調查，訪問來自10個國家嘅8,300多名打工仔，了解佢哋工作環境嘅AI應用。
結果係，全球有約64%受訪打工仔話，信任AI多過佢哋嘅經理，甚至有過半數人話，已開始向AI攞Advice！
呢個現象於亞洲尤為明顯，唔單只中國，連印度亦有89%受訪者都係咁諗。
至於其他國家嘅打工仔，同樣咁諗嘅，新加坡有83%，巴西78%，日本就76%。反而發達國家呢方面比例較低，都只係五字頭，澳洲同新西蘭係58%，美國、法國同英國分別得57%、56%及54%。
AI贏喺邊？首先係「冇偏袒」呢幾個字，員工認為AI能提供冇偏袒嘅資料、解決到問題，以及能跟足工作進度。
至於真人阿頭嘅優勢，則以情感為主，包括能夠體諒員工感受、提供輔導，以及創造辦公室文化。咦呢幾點乜你冇呀？咁幫你唔到。
余絲韻