絲絲講場：港人均擁382萬僅次瑞士

儘管中美兩國爆發貿易戰，令全球經濟蒙上陰影，但以香港人均身家只按年微跌0.6%嚟講，影響算係輕微。之不過，報告數字只計到截至今年中嘅過去一年，所以六月之後本地發生嘅一切一切對港人身家嘅影響，報告尚未反映到。

香港炒樓好賺過炒股

睇深入啲，香港身家超過100萬美元（約780萬港元）嘅，達51.6萬人；而身家超過5,000萬美元（約3.9億港元）嘅超高淨值人士，亦有約3,100人。瑞信仲估計，到二○二四年，前者港人數目將升至70萬人，增長36%。

香港仲有樣特別之處，就係其他地方嘅財富增長，都係多得股市升多過樓市升帶動，之但係，香港就啱啱掉轉，係唯一一個樓價升得急過股市嘅地方！

若以全球計，過去一年百萬富翁以美元計就增加110萬名，至估計4,680萬名，合共擁有158.3萬億美元淨資產，佔全球整體44%。

內地人平均僅得45萬

美國依然係去年創造最多百萬富翁嘅國家，增加咗67.5萬名，達1,860萬名，遙遙領先其他國家。

緊隨其後係中國，增長15.8萬名，達450萬名。美國及中國兩國去年分別創造3.8萬億及1.9萬億美元財富，前者進帳主要來自股市，後者大部分來自非金融資產如物業。

不過，講到名列全球最有錢嗰10%人當中，中國人佔1億人，首度超過美國嘅9,900萬人！但係講到人均財富，中國就只得5.85萬美元（約45.6萬港元），同美國嘅43.2萬美元（約337萬港元）可謂天與地。唔好問點解，大家心照啦！

余絲韻