Market Insight:港股式微有因可循

港股升市斷纜,恒指險守26,500點水平,成交降至756億元,暫當整固論。繼金管局出手「放水」三千億元之後,市場關注今日政府有咩噏。不過,老古都係平常心,冇希望就唔會有失望。

美團博染藍吸引炒風

同股友閑談,都覺恒指表現唔係太差,但炒咗幾十年港股,經歷過唔少經濟高低潮,都未曾試過好似呢期咁灰。點解?因為眼前政府施政失誤,搞到社會嚴重撕裂,好多嘢失去咗唔一定可以重建,尤其係人才同資金都在捨港而去,衝擊非同小可。個股表現兩極化,大量中小股交投與估值低迷,乏人問津。國策概念股被大戶「圍飛」,估值貴一貴都有人買,大量重磅中資股表現與經濟周期脫節,風險無法估量,外資一去不返,剩低北水撐場,升唔起又跌唔落,中短線投資者無所作為。

近年私有化個案唔少,主因正是個股估值低迷,死坐唔沽的長情股東隨時冇仇報。隨波逐流去炒高估值中資股,好似安踏體育(02020),股價高位見過73元,往績市盈率超過40倍,市值近兩千億元。

尋日有券商話有機會染藍的美團點評(03690),今年上半年仲蝕緊錢,但貨源盡入強者手,過去一年股價由低位翻一番有多,憑14億人餐飲外賣及旅遊預訂等電子商務平台概念,市值炒到上接近5,263億元,相比起舊年賺逾500億元人民幣兼有5.9厘息的中海油(00883),市值才5,277億元。若閣下認為買唔落手,唔緊要,反正這是大戶的玩意兒。股價繼續放紙鳶,他日真係順利染藍,等指數基金接貨再大炒一轉,亦造就大戶高位派發。君不見「前車」瑞聲科技(02018),染藍就如一場春秋大夢,如今股價不及染藍前的一半水平,嗚乎哀哉!

可見,港股愈炒愈冇癮係事實。過去經濟周期係危與機並存,如今港股已是中資股及內地資金天下,與內地經濟共榮辱。內地樓市唔冧、內銀股續維持暴利,外資休想沽空港股。作為小投資者,此地不留人,惟有外闖去找留人處!

古勝